У выставачнай зале музея народнай славы адкрылася незвычайная выстава “Рэтра-радыё”. Дзякуючы апантанаму сваёй справай калекцыянеру з горада Наваполацка Вячаславу Аляксандравічу Лубчонку, які збірае радыёапаратуру больш за 50 год, у музей ва Ушачах трапіла 85 адзінак разнастайных радыёпрыёмнікаў, радыёл, магнітафонаў і нават партатыўных тэлевізараў. Самыя незвычайныя з іх: сувенір ручка-прыёмнік беларускай вытворчасці, лямпавы радыёпрыёмнік “Москвич” 1950 года выпуску, радыёла “Урал – 52”, радыёпрыёмнік “VEF – 202” вытворчасці Латвійскай ССР і чорна-белы пераносны тэлевізар “Электроника ВЛ – 100”. Распрацоўка і вытворчасць тэлевізара былі прымеркаваны да стагоддзя з дня нараджэння У.І.Леніна, якое адзначалася ў 1970 годзе. Абазначэнне мадэлі тэлевізара “ВЛ – 100” расшыфроўваецца як “Владимир Ленин, 100 лет”.
Большасць радыёпрыёмнікаў з калекцыі – гэта падарункі неабыякавых да хобі Вячаслава Аляксандравіча сяброў, калег і знаёмых. Сёння Аляксандр ужо на пенсіі, але нягледзячы на ўзрост, займае актыўную пазіцыю ў грамадскім жыцці. Пры яго дапамозе была арганізавана выстава радыёпрыёмнікаў у Полацкім дзяржаўным універсітэце, якой вельмі зацікавіліся студэнты.
Запрашалі калекцыянера з выставай і ў Полацкі дзіцячы музей. Нягледзячы на тое, што ў наш век лічбавых інфармацыйных тэхналогій з’яўляюцца на свет усё больш дасканалыя сродкі сувязі і перадачы інфармацыі, радыё яшчэ доўга не згубіць сваёй актуальнасці. Хто ведае, можа сённяшнія смартфоны, ноўтбукі і планшэты праз некалькі дзесяцігоддзяў таксама апынуцца на вітрынах выставачнай залы музея?
Запрашаем наведаць выставу, якая будзе працаваць да канца сакавіка.
В.НАВУМАЎ, навуковы супрацоўнік музея народнай славы імя У.Е.Лабанка.