Таленавіты чалавек – таленавіты ва ўсім. Гэту народную мудрасць удала пацвярджае вучаніца Ушацкай сярэдняй школы Злата Клачок. Нягледзячы на дастаткова шчыльны “вучэбны” графік (зараз дзяўчына рыхтуецца да ўдзелу ў заключным этапе рэспубліканскай алімпіяды па беларускай мове і літаратуры), знаходзіць час дзесяцікласніца і на актыўную грамадскую дзейнасць, творчасць. Днямі ж імя нашай юнай зямлячкі прагучала на ўсю Беларусь. Прычым, падстаў для гэтага было адразу дзве.
Трывалыя веды
У мінулую суботу Злата прыняла ўдзел у рэспубліканскім тэлевізійным праекце “Я ведаю!”
– Калі яшчэ ў верасні прайшла абласны адборачны тур, не паверыла, што паеду на гульню. Гэта новы вопыт і яркія ўражанні! – падзялілася з намі школьніца. – Што ўрэшце настаў мой “час-ікс”, даведалася ўсяго за тыдзень. Каб не разгубіцца, перагледзела некаторыя перадачы праекта, пазнаёмілася з тэматыкай пытанняў. У Мінск жа адправілася разам са сваёй настаўніцай Ірынай Уладзіміраўнай Леснічэнкай. Удзячна ёй за веды і падтрымку! На здымачнай пляцоўцы была прыемная добразычлівая атмасфера. Перад запісам нам растлумачылі, як паводзіць сябе ў студыі. Але хваляванняў ад гэтага менш не стала…
Нягледзячы на сур’ёзную канкурэнцыю (многія канкурсанты ўжо прымалі ўдзел у праекце ці мэтанакіравана рыхтаваліся да яго), Злата годна справілася з заданнямі першага тура, абышоўшы многіх, у тым ліку ўсіх прадстаўнікоў устаноў адукацыі Віцебшчыны. Найбольш прыемнымі для ўшачанкі былі пытанні па любімых ёю прадметах – беларускай мове і літаратуры. Не выклікалі цяжкасцей таксама заданні па хіміі і біялогіі. А вось над астатнім давялося “паламаць галаву”, часам паспадзявацца на інтуіцыю.
– У другім туры эмоцыі ўзялі верх над ведамі, логікай, – расказала Злата. – Здавалася б, ведаю адказ на пытанне, але шукаю “падводныя камяні”. Вось, як кажуць, і перамудрыла. Да таго ж стаяла ў першым радзе і не магла назіраць за паводзінамі іншых канкурсантаў. Яны, калі ведалі правільны адказ на пытанне, падымалі руку. Мне ж даводзілася гутарыць з вядучым Георгіем Калдуном пра самае складанае, што крыху збівала і засмучала. Шкада, што не атрымалася дайсці да трэцяга тура. Аднак гэта цудоўны стымул пашыраць далягляд. У наступным годзе паспрабую яшчэ!
Паглядзець перадачу з удзелам Златы можна будзе ў хуткім часе па тэлеканале “Беларусь 1”. Выпускі праекта “Я ведаю!” выходзяць па суботах і нядзелях у 13:30.
… і творчы настрой
Прайшло ўсяго два дні пасля прыгаданых тэлевізійных прыгод, як З.Клачок зноў накіравалася ў сталіцу…
Напрыканцы мінулага года быў аб’яўлены конкурс “У словах-вобразах, у песнях вольнаплынных…”, прымеркаваны да 100-годдзя першага выдання паэмы Якуба Коласа “Сымон-музыка” і 95-годдзя паэмы “Новая зямля”. Далучыцца да яго вырашыла і Злата, якая захапляецца паэзіяй і сама піша вершы ледзь не з дзіцячага сада.
– Час дазваляў паэксперыментаваць, паколькі ляжала ў бальніцы, – зазначае юная ўшачанка. – Калі ж даведалася, што на конкурс было пададзена каля 1500 работ, згубіла надзею быць заўважанай. Але дарэмна! Стала лаўрэатам творчага спаборніцтва і атрымала ад Саюза пісьменнікаў Беларусі цудоўныя падарункі – кнігі з аўтографамі аўтараў.
Прывёў жа дзяўчыну да такога дасягнення наступны паэтычны твор:
Пойдзем разам да Коласа шляхам жыцця
Па сцяжынцы, што стужкай віецца,
У Альбуці вітае нас, бы з забыцця,
Гаспадар, і ў вусы смяецца.
Творца “новай зямлёй” называе куток,
Дзе Міхал сваю долю шукае.
Бо на ростанях трэба з сотні дарог
Выбраць тую, дзе шчасце чакае.
Нам да хмаркі бязроднай падобнымі быць
Не стае, бо Айчына – адзіна!
Казкі жыцця ўсіх навучаць любіць:
І бацькоў, і малую радзіму.
Вабяць родныя вобразы ў родных мясцінах
І з’яўляюцца новыя думкі ў дарозе,
А адлёт жураўлёў (для героя ён мілы!)
Запрашае паэта пісаць верш у прозе.
Падрыхтавала Кацярына КАВАЛЕЎСКАЯ.
