Аб’ектаў, дзе патрабуецца гаспадарская рука, на Ушаччыне нямала, аднак падчас правядзення раённага суботніка галоўныя працоўныя сілы былі накіраваны на добраўпарадкаванне месцаў, што знаходзяцца на віду і ствараюць першае ўражанне пра наш рэгіён. Размова ідзе пра буйныя дарогі і мясцовасць, што да іх прылягае. Абкосам травы, высечкай і выкарчоўкай неахайных зараснікаў займаліся камунальнікі і лясгасаўцы, газавікі і дарожнікі.
Работнікі розных арганізацый знішчалі баршчэўнік у населеных пунктах і наводзілі парадак на грамадзянскіх могілках. Так, напрыклад, у Лутаве давялося ўбачыць дружную каманду з філіяла “Сарочына” Віцебскага КХП. “На гэтым участку працуем неўпершыню. Летась наводзілі парадак непасрэдна на могілках, на мінулым суботніку ссякалі хмызняк, было задзейнічана тры адзінкі тэхнікі, сёння ж спальваем вецце і абкошваем тэрыторыю. Раней таксама займаліся добраўпарадкаваннем ваўчэнскіх могілак”, – расказаў пра фронт работ інжынер-энергетык філіяла Аляксандр Арцямёнак.
У план мерапрыемстваў суботніка неспадзявана дадаў новых пунктаў ураган, што прайшоўся па раёне якраз напярэдадні. Вынікам разгулу стыхіі сталі сотні паваленых дрэў, абарваныя правады, сапсаваныя дахі як прыватных, так і сельскагаспадарчых пабудоў. Ля дарогі ў Чарсцвядах вецер, напрыклад, знёс інфармацыйны стэнд, што пазначае межы тэрыторыі Глыбачанскага лясніцтва, і яго работнікі Аляксандр Смаляк і Аляксандр Агідулін устанавілі новы знак. “Сёння ў нас напружаны графік: зараз завершым гэту работу і паедзем на другі ўчастак, дзе трэба ўбраць паваленыя дрэвы”, – патлумачылі мужчыны. Насваволіў буран і ў самой Глыбачцы: у бярозавым гаі на ўездзе ў аграгарадок палягло каля чатырох дзясяткаў дрэў – хапіла спраў для работнікаў прыватнага прадпрыемства “Ніксілбуд”, якія займаліся ліквідаваннем гэтых наступстваў. Трэснула і завісла над дзіцячай горкай вялікае дрэва ў скверы ва Ушачах, таму падчас суботніка брыгада электрыкаў і цеплатэхнікаў УП ЖКГ займалася дэмантажом атракцыёна, які будзе адноўлены, калі ліквідуюць небяспечную таполю.
“На нашай тэрыторыі дрэвы, на шчасце, устаялі, але нападала шмат сучча”, – патлумачыла загадчык інфекцыйнага аддзялення райбальніцы Вольга Ярмош, якая разам з калегамі і маленькім сынам Максімкам наводзіла парадак ля бальнічных карпусоў.
А ля будынка, што праз дарогу, шчыравала ў гэтую раніцу больш сотні чалавек: работнікі аддзела па адукацыі размяркоўвалі грунт па аб’ектах вялікай тэрыторыі ля дзіцячага сада №3, будаўнікі ўкладвалі плітку. Усе працавалі дружна і “з аганьком” – некаторыя нават у прамым сэнсе слова: наўкол разляталіся іскры ад зварачных апаратаў наваполацкіх мантажнікаў, якія ўстанаўлівалі металічныя каркасы альтанак.
Вялікі аб’ём работ быў выкананы і на сяле. Так, напрыклад, у Ільюшыне прадстаўнікі аддзела ідэалагічнай работы, культуры і па справах моладзі пачалі разборку старога будынка клуба. Ва ўсіх аграгарадках і многіх вёсках работнікі арганізацый, шэфы і мясцовыя жыхары займаліся добраўпарадкаваннем, уносілі сваю лепту ў тое, каб наш раён выглядаў акуратна і прывабна.
Наталля БАГДАНОВІЧ.