Ушачане приняли участие в ежегодной акции «Неделя леса»

Главное

Шчодрае сонейка, якое ў мінулую суботу грэла зусім не па-сакавіцку, застаўляла ўдзельнікаў штогадовай вясенняй акцыі “Тыдзень лесу” здымаць верхнюю вопратку. Той, хто хоць раз удзельнічаў у пасадцы лясных культур, ведае – праца гэта не з самых простых, але вельмі патрэбная і карысная. “Займаемся высакароднай справай з прыцэлам на будучыню, – кажа ляснічы Ушацкага лясніцтва Андрэй Сяргеевіч Падвойскі, які на свежай дзялянцы ля шашы на Завячэлле прымаў унушальны дэсант памочнікаў. – Пакуль саспеюць для прамысловага выкарыстання гэтыя дрэўцы, нарыхтоўваць іх ужо будуць нашы дзеці і ўнукі…”

На плошчы ў 2,5 гектара працавала, разбіўшыся па парах, каля трох дзясяткаў чалавек. Усіх мужчын можна было смела запісваць у “рыцары”, бо кожны меў на ўзбраенні меч. Праўда, не сапраўдны, а Колесава – прайшло амаль 140 гадоў, як дырэктар Харкаўскага земляробчага інстытута вынайшаў гэту вузкую металічную прыладу для прабіцця ў глебе адтулін. Як і належыць спрадвеку, кожнага мечаносца суправаджала “дама” з зялёным букетам саджанцаў, якімі і запаўняла лункі. Напрыклад, дырэктар лясгаса Сяргей Аляксандравіч Даніловіч працаваў поруч з начальнікам аддзела землеўпарадкавання райвыканкама Людмілай Іванаўнай Андрэйчык – на дапамогу лесаводам на гэтым участку прыйшлі работнікі раёна газазабеспячэння і раённай улады на чале з намеснікамі старшыні райвыканкама Аленай Васільеўнай Пашковіч і Андрэем Вітальевічам Галяковічам. Апошні, дарэчы, працоўную дзейнасць пачынаў якраз у сістэме лясной гаспадаркі і пасадзіў не адну сотню саджанцаў: “Даўнавата ўжо гэта было, але рукі памятаюць!” – з усмешкай зазначыў ён.

Па словах А.С.Падвойскага, прыгаданую дзялянку зоймуць саджанцы сасны і бярозы, прычым размяшчаюцца дрэўцы палосамі ў суадносінах 60 працэнтаў хвойных, 40 – ліставых. Такая тэхналогія дазволіць у будучым без перашкод выкарыстаць бярэзнік, які расце хутчэй. На дзялянцы заўважыў і адзінокія дрэвы, якія лесарубы абышлі, – гэта пакідаліся насеннікі. І вецце ўбіраецца не цалкам, лесаводы запэўнілі, што яно будзе перагніваць на бедных пясчаных глебах у натуральных умовах. Такая тэхналогія змяшання культур дазволіць палепшыць пажарную бяспеку і недапусціць распаўсюджання хвароб (каранёвая губка).

У Кубліцкае лясніцтва ў суботу накіраваліся работнікі з адміністрацыі лясгаса, у Вялікадолецкім лесаводам дапамагалі мясцовыя культработнікі і педагогі, а наогул пасадкі былі арганізаваны ва ўсіх структурных падраздзяленнях прадпрыемства, удзел у іх прыняла ў агульнай колькасці амаль 200 чалавек. Сумеснымі намаганнямі ў першы дзень акцыі пасаджана лясных культур на плошчы 7,4 гектара, дапоўнена – на 8,2. Традыцыйна займаліся і добраўпарадкаваннем, уборкай смецця. Кіраўніцтва лясгаса ўдзячна членам працоўных калектываў, грамадскіх аб’яднанняў, якія дапамагаюць прафесіяналам у тым ліку і выконваць паказчыкі па лесааднаўленні. “Першыя пасадкі сёлета мы пачалі яшчэ 6 сакавіка, – расказвае С.А.Даніловіч. – Гэта як ніколі рана, але такая непрадказальная вясна. Нам дапамагалі беспрацоўныя, пенсіянеры, якія жадалі падзарабіць, працавалі і ў выхадныя. Дзякуй усім вялікі, спадзяёмся, што не адкажаце нам у падтрымцы і ў будучым”.

Настрой ва ўдзельнікаў акцыі, якая сёлета прысвечана Году малой радзімы і 75-годдзю Перамогі савецкага народа ў Вялікай Айчыннай вайне, быў неблагі. У дэндрапарку ля возера Вечалля таксама звінелі галасы – тут разам з работнікамі лясгаса дэкаратыўную алею ля дарожак стваралі прадстаўнікі грамадскіх аб’яднанняў – члены БРСМ з Ушацкай школы на чале з выконваючай абавязкі першага сакратара райкама Дзіянай Калбасавай і медыкі з раённай арганізацыі Чырвонага Крыжа. Трэба адзначыць, што да старту акцыі лесаводы падрыхтаваліся грунтоўна і ў іміджавым плане – добраахвотным памочнікам уручаліся сувеніры і кепкі з лагатыпам. А вось рыдлёўку, якую ў якасці прэзента таксама хацелі прыхапіць гарэзлівыя старшакласнікі, ім усё ж не аддалі – інвентар яшчэ спатрэбіцца іншым удзельнікам мерапрыемстваў “Тыдня лесу-2020”, які працягваецца.

Усяго ва Ушацкім лясгасе вясной запланаваны пасадкі лясных культур на плошчы 105 гектараў. На пачатак бягучага тыдня меўся паказчык у 72,6 гектара або 69,1 працэнта, што значна больш сярэднеабласнога (35,2). А дапоўніць лясныя культуры на ўчастках, дзе не прыжыліся раней, неабходна на 280 гектарах, фактычна выкананы гэтыя работы на 95, што складае 33,9 працэнта пры сярэднеабласным паказчыку 26,5.

Дзмітрый РАМАНОЎСКІ.

 



1 комментарий по теме “Ушачане приняли участие в ежегодной акции «Неделя леса»

  1. Ходить летом по грибы и ягоды, съездить на шашлычок в лес и многое другое любят все, и поэтому всем необходимо принимать активное участие в возобновлении леса и наведении там порядка. Неделя леса — это неделя нашей здоровой экологии.

Добавить комментарий

Ваш e-mail не будет опубликован. Обязательные поля помечены *