Ашуканцы працягваюць зарабляць на даверлівасці беларусаў. На сённяшні дзень рэкорд крадзяжу ў фізасобы – больш за 200 тысяч долараў. Такой сумы пазбавіўся мужчына, якому патэлефанавалі нібыта са службы бяспекі банка і расказалі, што ў іх установе праблемы з супрацоўнікамі: тыя “зліваюць” банкаўскія даныя, а каб іх злавіць, трэба ўступіць у аператыўную гульню. “Мы абяцаем, што Вашы грошы нікуды не дзенуцца, яны ўсе пазначаны”, – запэўнівалі яны. Як ні дзіўна, схема спрацавала – беларус на працягу двух тыдняў ажыццявіў 253 транзакцыі: ён прыходзіў у банк, адкрываў розныя рахункі і клаў на іх грошы. Работнікі банка папярэджвалі, маўляў, той звязаўся з ашуканцамі. Але ён не верыў. Да таго часу, калі ўсе яго грошы не “растварыліся”…
Яшчэ адзін нядаўні прыклад. Маладой жанчыне патэлефанаваў незнаёмец, прадставіўся супрацоўнікам банка і дзеля правядзення аперацыі на яе карысць папрасіў даныя карткі. Тая паверыла – і з яе рахунка знікла некалькі соцень рублёў. Калі ж грамадзянка прыйшла ў банк, высветлілася, што ад яе імя аформлены крэдыт на чатыры тысячы. Толькі дзякуючы аператыўнасці звороту апошні ўдалося заблакіраваць.
◆ Памятайце, што трэція асобы ні ў якім разе не павінны ведаць рэквізіты вашай банкаўскай плацежнай карты: яе нумар, тэрмін дзеяння, код CVV, сеансавыя ключы і іншую інфармацыю з SMS-паведамленняў. Сапраўдным супрацоўнікам банка няма неабходнасці ўдакладняць у кліентаў персанальныя данныя – яны імі валодаюць з пачатку абслугоўвання. Пры мінімальным падазрэнні на нядобрасумленнасць таго, хто тэлефануе, спасылайцеся на занятасць, спыніце размову і самі набярыце ў банк, каб пераканацца ў сваёй бяспецы. Дарэчы, у выпадку рэальнай пагрозы карта блакіруецца банкам без усялякага ўдзелу трымальніка.
Падобныя выпадкі, хоць і са значна меншымі сумамі, фігуруюць і ў зводках Ушацкага райаддзела міліцыі. Як расказаў старшы оперупаўнаважаны М.А.Храпавіцкі, махляры выклікаюць абанентаў пераважна з нумароў, якія пачынаюцца на +370, +371, +372, +376. Як правіла, прадстаўляюцца супрацоўнікамі “Беларусбанка” (напрыклад, са службы бяспекі або фінансавага маніторынгу) і рознымі “зачэпкамі” спрабуюць атрымаць звесткі аб рэквізітах плацежных карт, астатках па рахунках, даведацца коды з SMS-паведамленняў ад банка, пашпартныя даныя. Дарэчы, часта зламыснікі звяртаюцца па імені, імені па бацьку, што яшчэ больш усыпляе пільнасць людзей.
Кацярына КАВАЛЕЎСКАЯ.
