У Віцебску прайшла 4-я справаздачна-выбарная канферэнцыя абласной арганізацыі РГА “Белая Русь”. Каля 300 дэлегатаў з 26 арганізацыйных структур падвялі вынікі зробленага за 2017-2022 гады, дзяліліся вопытам, будавалі планы на будучыню. Удзел у мерапрыемстве прынялі і дэлегаты Ушацкай раённай арганізацыі.
Абласная арганізацыя сёння налічвае 19614 чалавек, аб’яднаных у 941 пярвічку. Члены “Белай Русі” працавалі на ўсіх этапах выбарчай кампаніі, аказвалі дапамогу ў падрыхтоўцы і правядзенні рэферэндуму, удзельнічаюць ва ўвекавечанні памяці падзей Вялікай Айчыннай вайны, суботніках па добраўпарадкаванні брацкіх магіл і помнікаў, тыдні лесу і многіх іншых акцыях і мерапрыемствах.
Дзейнасць нашых актывістаў не засталася непрыкмечанай на абласным узроўні: за шматгадовую добрасумленную працу ў сістэме адукацыі Ганаровай граматай Галоўнага ўпраўлення па адукацыі аблвыканкама ўзнагароджана педагог Ушацкай школы, старшыня пярвічкі “Белай Русі” Т.У.Крахотка. За актыўны ўдзел у грамадскім жыцці, значны ўклад у працу па правядзенні грамадска-значных мерапрыемстваў Ганаровай граматай Галоўнага ўпраўлення ідэалагічнай работы і па справах моладзі аблвыканкама адзначаны начальнік аддзела ідэалагічнай работы, культуры і па справах моладзі райвыканкама, член раённага савета РГА “Белая Русь” П.А.Аляксеенак.
Аднагалосным рашэннем удзельнікаў канферэнцыі сваю дзейнасць на пасадзе старшыні абласной арганізацыі працягне Уладзімір Уладзіміравіч Цярэнцьеў.
Вольга КАМАРКОВА.
