Многія сучасныя жанчыны мараць сесці за руль аўтамабіля, аднак рашаюцца на гэта далёка не ўсе, тым больш калі за плячыма ўжо не адзін дзясятак пражытых гадоў. А вось жыхарка Сарочына Галіна Васільеўна Свідзінская такі намер ажыццявіла, прычым прыйшла на заняткі да аўтаінструктара, калі ёй ужо было за пяцьдзясят.
— З усіх, хто на той момант праходзіў навучанне, была самай сталай, — з усмешкай прыгадвае жанчына. — Аднак на правы здала з першай спробы, бо вучылася не для «паперкі», а для грунтоўных ведаў.
Зрэшты, з тэхнікай Галіна Васільеўна на «ты» з маладых гадоў: яшчэ калі навучалася ў Лужаснянскім тэхнікуме паралельна са спецыяльнасцю агранома атрымала правы трактарыста — прымяняла навыкі і на практыцы, калі падчас вучобы даводзілася апрацоўваць палі ў падшэфнай гаспадарцы. Паслухмяна паводзіць сябе ў яе ўмелых руках і мотатэхніка: жанчына асвоіла скутар, а ў свой час ездзіла на «Мінску» і нават на «Урале» з люлькай. І вось чатыры гады таму сын Віктар падарыў любімай матулі ОPEL ZAFIRA, за рулём якога — як бачна на здымку — Галіна Васільеўна выглядае проста шыкоўна. Вадзіцелем яна з’яўляецца вельмі дысцыплінаваным і ўважлівым: ніколі не перавышае хуткасць, выконвае ўсе прадпісанні Правілаў дарожнага руху, ну а ў майстэрстве ваджэння дасць фору многім прадстаўнікам моцнага полу.
Наталля БАГДАНОВІЧ.
