Аляксандр Лукашэнка зрабіў рабочую паездку ў Магілёўскую вобласць, дзе наведаў ААТ “Рассвет імя К.П.Арлоўскага” ў Кіраўскім раёне. Размова ішла аб тым, як у краіне развіваецца бульбаводства – пачынаючы ад селекцыі айчынных сартоў і заканчваючы вытворчасцю чыпсаў і крухмалу. Прэзідэнту таксама далажылі аб арганізацыі палявых работ не толькі ў гаспадарках Магілёўскай вобласці і Кіраўскага раёна, але і па ўсёй Беларусі.
У нашай краіне бульбу вырошчваюць пераважна фермеры і насельніцтва, і ў меншай ступені – сельгасарганізацыі. Пасля праблем з наяўнасцю бульбы ў гандлі вясной бягучага года, прынята рашэнне яшчэ павялічыць плошчы пад вырошчванне гэтай культуры. Кіраўнік дзяржавы папярэдзіў, што ў бягучым годзе захаваецца значны попыт на бульбу за межамі краіны, у тым ліку ў суседняй Расіі, дзе ў час вясенняга дэфіцыту была прададзена нават насенная бульба.
Прэзідэнта запэўнілі, што ўраджай бульбы будзе дастатковы. Важна падрыхтаваць агароднінасховішчы і захаваць ураджай да вясны, каб былі наладжаны цесныя сувязі з гандлёвымі сеткамі і яны своечасова пастаўлялі бульбу ў магазіны. Асобна Прэзідэнт спытаў пра наяўнасць бульбы цяпер у магазінах і яе кошт для насельніцтва. Было даложана, што гандаль на 95% забяспечаны ранняй бульбай, цана ў сярэднім 1,30. Але гэта на раннія гатункі, а ў далейшым яна знізіцца.
Аляксандр Лукашэнка звярнуў увагу, што надвор’е ў гэтым годзе не заўсёды было спрыяльным для аграрыяў: шматразовыя замаразкі, заліўныя дажджы, ранні туман, фітафтора. А таму вучоным даручана атрымаць устойлівы да хвароб сорт бульбы. Пры Нацыянальнай акадэміі навук працуе цэлы Інстытут бульбаводства. “Скарб”, “Маніфест”, “Ласунак”, “Брыз” – усім вядомыя сарты, ёсць і экзотыка – “Сапфір” з карыснай фіялетавай мякаццю. Але людзі больш любяць традыцыйны, класічны.
Размова ішла і аб тым, каб больш шырока выкарыстоўваць беларускую бульбу ў арганізацыях грамадскага харчавання, у тым ліку ў знакамітай сетцы “Мак.бай”. Прэзідэнт нагадаў, што былыя ўладальнікі сышлі з Беларусі і дзяржаве давялося ўмяшацца, каб сетка прадоўжыла працаваць. “Там павінна быць беларускае”, – паставіў задачу Аляксандр Лукашэнка і расказаў, што яму было б цікава наведаць гэту сетку, але зробіць ён гэта пры адной умове – калі там яго пачастуюць стравай, зробленай на 100 працэнтаў з беларускіх прадуктаў.
Па матэрыялах БелТА.
