Чаканай падзеяй напярэдадні новага навучальнага года для многіх нашых землякоў традыцыйна становіцца раённая педагагічная канферэнцыя. Сёлета яна ўразіла маштабам: на сустрэчу калектывы ўсіх устаноў адукацыі Ушаччыны сабраліся амаль 100-працэнтным саставам.
Флагманы навацый
Яшчэ да пачатку афіцыйнай часткі мерапрыемства, якое ладзілася ў раённым цэнтры культуры, многія педагогі прэзентавалі свае метадычныя распрацоўкі, творчыя дасягненні, абмяркоўвалі новаўвядзенні, абменьваліся навінамі. “Кітайскую мову сама яшчэ вывучаю, таму школьнікі могуць расслабіцца: урокі ці факультатывы, напэўна, толькі праз год з’явяцца”, – усміхаецца Вольга Панамарова з Ушацкай СШ. “Ці люблю я сваю справу? Мяркуйце самі: акрамя пасады фізрука з 1 верасня зноў яшчэ кіраўніком па ваенна-патрыятычным выхаванні буду”, – не хаваў эмоцый Арцём Церашкавец з Глыбачанскай школы. “Ну а для мяне сённяшняе мерапрыемства – нагода ўласнае свята працягнуць, – далучылася Алена Сандзюк з дзіцячага сада №4 г.п.Ушачы. – Заўтра 55-гадовы юбілей адзначу, ну а сёння не менш прыгожая дата: 33 гады ў прафесіі”.
Цудоўны падарунак для педагогаў падрыхтавалі супрацоўнікі музея – вялікую экспазіцыю з гісторыі сістэмы адукацыі Ушаччыны. “А вы ведалі, што ў раёне некалі 86 школ было? – раззадорвала ўсіх лектар-экскурсавод, а да нядаўняга часу настаўнік Вера Спірчонак. – Ёсць нават схема іх размяшчэння – гэта заслугага колішняга кіраўніка аддзела па адукацыі Івана Сямёнавіча Кулагі”. “Ой, на здымку свайго бацьку ўбачыла, тут ён яшчэ ў ролі выпускніка, – расхвалявалася Наталля Стрыжонак з Ільюшынскай СШ. – Прыемна, што кожнае фота падпісана, ніводнае прозвішча не забыта”.
Быць настаўнікам – прэстыжна
Як пазней адзначыць начальнік аддзела па адукацыі райвыканкама Людміла Давыдава, над захаваннем годных традыцый будуць працаваць і ў новым навучальным. Такая задача пастаўлена перад усімі 220 педагогамі Ушаччыны. Канечне, хацелася, каб іх было больш: на сённяшні дзень галіна мае патрэбу ў 27 спецыялістах: у першую чаргу, настаўніках матэматыкі і фізікі, сацыяльных педагогах, псіхолагах, дэфектолагах. Як і летась, у наш раён прыйшло 9 маладых спецыялістаў. Але ж два педагогі, нягледзячы на шэраг прадугледжаных калектыўнымі дагаворамі льгот, пасля адпрацоўкі звольніліся – замацаванне кадраў за апошнія тры гады складае 60%. Паказчык нядрэнны, але ж палепшыць яго плануецца праз укараненне новых форм работы з акцэнтам на прафарыентацыю. Так, зараз у школах працуюць факультатывы “Прафесія маёй мары”, “Хачу быць і буду…”, праводзяцца анлайн-канферэнцыі з прадстаўнікамі ўстаноў вышэйшай і сярэдняй спецыяльнай адукацыі, арганізацый раёна. Летась функцыянавала 8 профільных груп: 5 педагагічных і 3 аграрныя.
Дбаюць у сістэме і пра годны ўзровень зарплаты: у мінулым навучальным за кошт павышэння кантрактнай надбаўкі яна павялічвалася тройчы, падрасце і з верасня 2025-га. Не застаюцца па-за ўвагай таксама камфортныя ўмовы на рабочых месцах: усюды праведзены касметычны рамонт класных кабінетаў і харчаблокаў, спартзалаў і холаў, бібліятэк і лесвічных пляцовак. Штогод вялікія сродкі накіроўваюцца на ўмацаванне матэрыяльна-тэхнічнай базы, нядаўна атрымалі новы школьны аўтобус.
Выпускнікі парадавалі
Адзін з самых “гаваркіх” паказчыкаў работы педагогаў – паспяховая здача іх навучэнцамі выпускных іспытаў, паступленне ў прэстыжныя ўстановы. І тут варта адзначыць, што сярэдні бал на цэнтралізаваных экзаменах у раёне склаў 60. Канечне, хацелася б лепшага выніку – абласны паказчык на 5,6 бала вышэйшы, аднак рост усё ж ёсць: летась нашы адзінаццацікласнікі справіліся на 55,4. Лепшы сёлетні паказчык – 66,8 – у Вялікадолецкай школе, а самы нізкі – у Ільюшынскай: 45,4. Вучняў, якія атрымалі “0”, не было.
Адразу 5 выпускнікоў раёна ўзнагароджаны залатымі медалямі, усе прадоўжаць навучанне ў ВНУ. Так, напрыклад, наша зорачка Ксенія Барысёнак з Ушацкай СШ абрала прэстыжны факультэт біялагічных тэхналогій у БДУ. Дарэчы, яго студэнткай як пераможца рэспубліканскай алімпіяды па біялогіі дзяўчына стала без уступных іспытаў. Усяго ж вышэйшыя навучальныя ўстановы пакарыліся 58 працэнтам нашых выпускнікоў (у 2024-м – 44).
Адзнака за працу
Шмат узнагарод атрымалі ўшацкія педагогі падчас мерапрыемства. Ганаровай граматай аддзела па адукацыі райвыканкама адзначаны настаўнікі пачатковых класаў, беларускай мовы і літаратуры Арэхаўскай СШ Таццяна Гардзіёнак і Алёна Кашко, педагог сацыяльны з гэтай жа ўстановы Вольга Жукава; настаўнік біялогіі Алена Жук, а таксама Уладзімір Лапіцкі і Мікалай Аніскевіч, якія выкладаюць фізкультуру, фізіку і інфарматыку адпаведна (другі – яшчэ і кіраўнік па ваенна-патрыятычным выхаванні) з Вялікадолецкай школы; настаўнік матэматыкі Анастасія Храпавіцкая і кіраўнік па ваенна-патрыятычным выхаванні Віктар Леўшык з Ільюшынскай; выхавацелі дзіцячых садоў №2 і №4 Алена Грышчанка і Святлана Кірпічонак; метадыст раённага вучэбна-метадычнага кабінета Таццяна Крывапушчанка; настаўнік-дэфектолаг дзіцячага сада №1 Таццяна Васілеўская; а таксама настаўнікі Ушацкай школы: Надзея Ціханенка, Вольга Несцярэнка, Людміла Бабаедава – пачатковыя класы, Алена Марозава – хімія і біялогія, Юлія Красілевіч – фізічная культура і здароўе, Людміла Трафімава – руская мова і літаратура, Марына Міхайлава – гісторыя, Ірына Маслоўская – англійская мова, Алена Жарнасек – абслугоўваючая праца. Намеснік старшыні райвыканкама Генадзь Ягораў уручыў узнагароды раённага ўзроўню. Парадаваліся прысутныя і за пераможцаў раённага этапу рэспубліканскага конкурсу па добраўпарадкаванні – імі сталі Вялікадолецкая школа (дырэктар – М.Казлоўская) і дзіцячыя сады № 2, 3 і 4 (загадчыкі – Л.Напрыенка, С.Лёля, С.Баранава), а таксама за тых, хто навёў лепшы парадак да новага навучальнага – дзіцячы сад №4 і Глыбачанская СШ (Т.Пахолак).
Не забыліся арганізатары мерапрыемства і пра ветэранаў педагагічнай працы – падзякавалі за шматгадовую дзейнасць, уручылі сувеніры. Апладысментамі сустракалі ў зале новаспечаных педагогаў. “Выкладаць не баімся, практыка ж у школах была, – казалі яны пазней. – А вось перад калегамі хочацца выглядаць дастойна – спадзяемся, што атрымаецца”. Разам з сынамі і дачушкамі, якія сёлета ідуць у першы клас, выходзілі на сцэну і многія работнікі ўстаноў – падарункі для іх падрыхтавала раённая арганізацыя Беларускага прафсаюза работнікаў адукацыі і навукі.
* * *
Якім будзе новы навучальны для нашых школьнікаў? Складаным – магчыма, цікавым – хутчэй за ўсё, прыгожым – адназначна! Апошняе даказала мілае дэфіле ад вучняў Ушацкай школы: яны прэзентавалі ўборы дзелавога стылю. Расквецілі мерапрыемства таксама выхаванцы дашкольных устаноў і першакласнікі – чыталі вершы, выступалі з харэаграфічнымі нумарамі. Прагучаў на канферэнцыі і першы званок для настаўнікаў – яго далі дыпламантка абласной алімпіяды па рускай мове Анастасія Клачок і першакласнік Раман Дунік.
Кацярына КАВАЛЕЎСКАЯ.
