«Прамая тэлефонная лінія» з чытачамі нашай газеты, якую праводзіў на мінулым тыдні начальнік філіяла «Ушачы» ААТ «Аўтатранспартнае прадпрыемства №6 г.Наваполацк» Д.М.АНІСКЕВІЧ, праходзіла ў спакойным рэжыме. Са сваімі пытаннямі да Дзмітрыя Міхайлавіча звярнуліся нямногія. Аднак пачуць адказы на іх, напэўна, будзе цікава кожнаму жыхару нашага раёна.
— Да Вас звяртаецца жыхарка Вашкова. Чула, што ў хуткім часе ў нашай вёсцы з’явіцца аўтобусны прыпынак. Гэта, безумоўна, радасная вестка, аднак наколькі яна праўдзівая?
— Хачу вас запэўніць: аўтобусны прыпынак у Вашкова, сапраўды, хутка з’явіцца. Сумесна з усімі зацікаўленымі службамі прынялі рашэнне размясціць яго непадалёк ад увахода на тэрыторыю санаторыя «Лясныя азёры».
— На аўтастанцыі са сцяны знялі інфармацыйны стэнд з раскладам руху аўтобусаў. Спадзяёмся, гэта часовая мера…
— Безумоўна. Неабходнасць у яго здыманні звязана з правядзеннем у зале аўтастанцыі фарбавальных работ. Ужо праз некалькі дзён стэнд зноў будзе вывешаны.
— Калі на аўтобусных прыпынках у сельскіх населеных пунктах з’явіцца расклад руху грамадскага транспарту? Пытанне, як дабрацца да Ушач з Селішча, дзе часам бываю, для мяне застаецца загадкай.
— Замена шыльдаў на аўтобусных прыпынках праводзіцца рэгулярна. На жаль, новыя прыгожыя металічныя таблічкі доўга не жывуць — іх невядомыя асобы псуюць, ламаюць ці крадуць. Зараз ажыццяўляецца выраб новых шыльдаў з раскладам — яны з’явяцца на аўтобусных прыпынках на працягу месяца, а ў буйных населеных пунктах, у тым ліку і ў Селішчы, нават раней. Што ж датычыцца інфармацыі аб неабходным вам маршруце, то атрымаць яе можна па тэлефоне дыспетчарскай нашага аўтатранспартнага прадпрыемства ці на афіцыйным сайце раённай газеты «Патрыёт».
К.КАВАЛЕЎСКАЯ.
