Па папярэдніх даных, пасля праведзенай спецыялістамі інспекцыі па насенняводству, каранціну і ахове раслін праверкі азімых культур, на палетках нашага раёна больш за ўсё пацярпеў азімы рапс – 435 гектараў з 2130 пасеяных. Страты азімай пшаніцы назіраюцца на плошчы 206 гектараў з 2548 (паказчык адпавядае норме), азімага трыцікале – 196 з 909 і азімага жыта 401 з 2062. І калі ад халадоў пацярпелі зерневыя апошніх тэрмінаў сяўбы, што заканамерна – не паспелі ўкараніцца і раскусціцца, то рапс наадварот – пасеяны ў жніўні. Гэта культура перарастае, асабліва пры працяглай цёплай восені.
