Кожны пенсіянер мае права на своечасовае атрыманне пенсіі. Тое ж, што ўшачане не пускаюць гэтую справу на самацёк, пацвердзіла «прамая лінія», якую на мінулым тыдні праводзіла начальнік аддзела назначэння пенсій і дапамог упраўлення па працы, занятасці і сацыяльнай абароне райвыканкама Кацярына Аляксандраўна ГАБЛАЯ. Магчымасцю задаць сваё пытанне спецыялісту скарысталіся многія нашы чытачы. Знаёмім вас з некаторымі з іх.
— 11 верасня мне споўнілася 75 гадоў. Не працую. 25 верасня атрымала пенсію, памер якой у параўнанні з папярэднім месяцам не змяніўся. Я так разумею, надбаўка па дасягненні 75 гадоў мне не была выплачана. Чаму?
— Даплаты да пенсій устанаўліваюцца з першага чысла месяца, наступнага за месяцам дасягнення ўзросту 75 або 80 гадоў. Так што атрымаць пенсію разам з надбаўкай вы зможаце ў кастрычніку. На сённяшні дзень памер даплаты да пенсій непрацуючых пенсіянераў складаюць: для грамадзян, якія дасягнулі 75-гадовага ўзросту, — 335 тысяч 900 рублёў, для 80-гадовых грамадзян да гэтай сумы дабаўляецца яшчэ 167 тысяч 900 рублёў.
— Атрымліваю пенсію па пластыкавай картцы. Навошта кожны год афармляць адпаведную заяву?
— Гэта робіцца для забеспячэння кантролю за мэтавым выкарыстаннем пенсійных сродкаў. Пры пералічэнні пенсіі на пластыкавую картку работнікі банка не ведаюць, хто гэтымі грашовымі сродкамі фактычна карыстаецца і ці жывы пенсіянер. Каб прадухіліць незаконнае атрыманне пенсіі, заканадаўствам краіны ўстаноўлены гадавы тэрмін дзеяння заявы аб пераліку пенсіі на карт-рахунак. Дарэчы, згодна з артыкулам 83 Закона Рэспублікі Беларусь «Аб пенсійным забеспячэнні» прадугледжаны альтэрнатыўны спосаб выплаты пенсіі: не толькі праз банк (пры наяўнасці заключанага дагавору), але і праз арганізацыі паштовай сувязі. Права выбару застаецца за Вамі.
— Мне як маці інваліда назначана пенсія ў 50 гадоў. Калі я працягну працаваць, ці будзе мне пасля дасягнення агульнаўстаноўленага ўзросту дабаўлены стаж і зроблены пераразлік пенсіі?
— Не, не будзе.
— Мой паўналетні сын атрымлівае пенсію з выпадку страты карміцеля ва Ушацкім участку сувязі. Нядаўна хацеў перавесці пенсію на сваю картку ААТ «Прыорбанк», аднак спецыяліст упраўлення па працы, занятасці і сацыяльнай абароне адмовіў. Чаму?
— У адпаведнасці з Палажэннем аб парадку выплаты пенсій і дапамог іх пералік ажыццяўляецца на пенсійны рахунак, адкрыты ў межах раёна. Ваш сын мае магчымасць звярнуцца па гэтым пытанні ў падраздзяленні ААТ «Белаграпрамбанк» (г.п.Ушачы, вул. Савецкая, 24) ці ААТ «ААБ Беларусбанк» (г.п.Ушачы, вул.Савецкая, 33) і штомесяц сёмага чысла атрымліваць пенсію з выпадку страты карміцеля на карт-рахунак выбранага банка.
— Аддзел кадраў нашай арганізацыі адмаўляецца збіраць дакументы і падаваць іх ва ўпраўленне. Што мне рабіць?
— Праявіце настойлівасць у адносінах да спецыяліста аддзела кадраў вашага прадпрыемства. Нагадайце яму, што ў адпаведнасці з артыкулам 76 Закона «Аб пенсійным забеспячэнні» наймальнік абавязаны своечасова афармляць дакументы аб стажы і заработнай плаце, неабходныя для назначэння пенсіі, і падаваць іх ва ўпраўленне па працы, занятасці і сацыяльнай абароне. Наймальнік нясе матэрыяльную адказнасць перад пенсіянерам за ўрон, нанесены несвоечасовым, няпоўным афармленнем гэтых дакументаў ці падачай недакладных звестак. Сумы, залішне выплачаныя па віне наймальніка, спаганяюцца ў карысць органа, які выплачвае пенсію, у бясспрэчным ці судовым парадку.
Падрыхтавала К.КАВАЛЕЎСКАЯ.