Благодаря реализации социального проекта «Родная Сторона — детям» в г.п.Ушачи открылась новая мини-футбольная площадка

Магчымасць гуляць у футбол на працягу ўсяго года атрымалі юныя ўшацкія аматары скуранога мяча. У сераду на стадыёне Ушацкай сярэдняй школы адбылося ўрачыстае адкрыццё сучаснай міні-футбольнай пляцоўкі са штучным пакрыццём. Будаўніцтва яе стала магчымым дзякуючы рэалізацыі сацыяльнага праекта “Родная сторона – детям”, мэтай якога з’яўляецца стварэнне ўмоў для здаровага ладу жыцця беларускім дзецям і падлеткам, забеспячэнне іх свабоднага доступу да спартыўнай інфраструктуры па месцы жыхарства, рэгулярных заняткаў гульнявымі відамі спорту.Мерапрыемства, прысвечанае адкрыццю новай пляцоўкі, атрымалася сапраўды ўрачыстым і сабрала шмат удзельнікаў і гледачоў. Яшчэ за гадзіну да пачатку на стадыёне школы было людна. Юныя футбалісты рыхтаваліся да першага матча, а мноства дзяцей скарысталіся магчымасцю сфатаграфавацца з гіганцкім мячом, які прывезлі арганізатары мерапрыемства. На фоне шматгалосай і радаснай дзятвы сур’ёзнасцю і сталым узростам выдзяляўся галоўны інжынер прадпрыемства меліярацыйных сістэм Мікалай Леанідавіч Фядосенка, які крытычна аглядаў аб’ект, на адкрыцці якога не мог не прысутнічаць – менавіта ушацкія меліяратары выконвалі работы па падрыхтоўцы асновы для пляцоўкі. На гэтыя мэты з раённага бюджэту было выдзелена 150 мільёнаў рублёў, а фінансавыя абавязкі па набыцці штучнага пакрыцця, ўзмоцненай агароджы і іх устаноўкі ўзялі на сябе прадстаўнікі СТАА “НТС” (праваўладальніка гандлёвага знаку “Родная сторона”).

Аб тым, што планы па будаўніцтву штучнага міні-футбольнага поля сталі рэальнасцю толькі дзякуючы сумесным намаганням мясцовых улад і арганізатараў праекту, гаварылі ў сваіх выступленнях ганаровыя госці ўрачыстасці. Старшыня райвыканкама Віктар Віктаравіч Родзіч павіншаваў ушачан з адкрыццём яшчэ аднаго знакавага аб’екта, дырэктар Дэпартамента забеспячэння спартыўных мерапрыемстваў асацыяцыі “Беларуская федэрацыя футбола” Ігар Эдуардавіч Паўлаў выказаў пажаданне каб першыя крокі юных ушацкіх футбалістаў па новай пляцоўцы сталі не толькі пачаткам шляху ў вялікі спорт, але і ў здаровае дарослае жыццё. Непасрэдны ж кіраўнік праекта “Родная сторона – детям” Дзмітрый Цыган выказаў упэўненасць ў тым, што адкрыццё аб’екта дапаможа выявіць новыя таленты, якія вырастуць у зорак узроўню Аляксандра Глеба і Валянціна Бялькевіча.Ганаровае права узняць Дзяржаўны сцяг Рэспублікі Беларусь атрымалі капітаны каманд “Вікторыя” і “Юнацтва”, сфарміраваных з выхаванцаў аддзялення футбола дзіцяча-юнацкай спартыўнай школы. Хуткацечная таварыская сустрэча на кубкі і прызы арганізатараў праекта дзякуючы адзінаму мячу, забітаму Алегам Манецкім, завяршылася вікторыяй “Вікторыі”. Але трэба адзначыць, што насамрэч гэта быў другі гол, бо перад пачаткам галоўнай сустрэчы спрытным ударам у левую ад варатара “дзявятку” вароты паразіў В.В.Родзіч, якому было даверана права першага сімвалічнага ўдару. “У добрай форме старшыня,” – пракаменціравалі  настаўнікі фізічнай культуры і трэнеры ДЮСШ.

Папярэднічалі ж спартыўным складнікам мерапрыемства традыцыйнае пераразанне стужкі В.В.Родзічам, І.Э.Паўлавым і кіраўніком праекта развіцця гандлёвай сеткі “Родная сторона” па Віцебскім рэгіёне Аляксандрам Анатольевічам Сезенем. Настаяцель храма святых пакутніц Мінадоры, Мітрадоры, Німфадоры протаіерэй Вячаслаў асвяціў пляцоўку.Яна мае стандартны памер – 20 на 40 метраў. Сучаснае пакрыццё “штучная трава” захоўвае структуру і колер на працягу многіх гадоў эксплуатацыі і ў рознае надвор’е. Ушацкая пляцоўка стала 34-й у краіне, а ў Віцебскай вобласці да гэтага пабудавана шэсць такіх спартыўных палёў: у Шаркоўшчыне, Гарадку, Віцебску, Оршы, Міёрах і Сянно. Усяго ж на працягу пяці гадоў дзякуючы ініцыятыве СТАА “НТС”, адной з буйнейшых беларускіх кампаній у сферы рознічнага гандлю ў Беларусі з’явіцца 118 сучасных міні-футбольных палёў.

Шматлікія госці змаглі ацаніць штучнае пакрыццё ярка-зялёнага колеру. Прыемна, што многія з іх прыйшлі не з пустымі рукамі – падарункі ў выглядзе спартыўнага інвентару перадалі выхаванцам ДЮСШ прадстаўнікі лясгаса, ПУП “НікСілБуд”, УП ЖКГ, ААТ “Ільюшынскі”. Шмат станоўчых эмоцый вызвала мерапрыемства ў дырэктара санаторыя “Лясныя азёры” І.А.Шыяна, заўзятага аматара спорту, які калісьці пачынаў займацца футболам разам са знакамітым беларускім паўабаронцам Аляксандрам Хацкевічам. І хоць не стаў Ігар Аляксеевіч прафесійным футбалістам, любоў да гульні нумар адзін засталася ў яго на ўсё жыццё. Тым больш здзівіў падарунак ад санаторыя “Лясныя азёры” – валейбольныя і баскетбольныя мячы.

– З намёкам на тое, што пляцоўка гэта не апошняя, – тлумачыў кіраўнік. – Я бачу зацікаўленасць раённай улады да развіцця спартыўнай інфраструктуры і спадзяюся, што мне давядзецца папрысутнічаць яшчэ не на адным адкрыцці спартыўных аб’ектаў у раёне.

Хоць і не ўручаў падарункаў кіраўнік адміністрацыі свабоднай эканамічнай зоны “Віцебск” Сяргей Віктаравіч Сташэўскі, аднак паабяцаў аказаць дапамогу ў абсталяванні асвятлення пляцоўкі і набыцці спартыўнай формы для выхаванцаў ДЮСШ.

Словы ўдзячнасці кіраўніцтву раёна і арганізатарам праекта “Родная сторона – детям” выказалі гаспадары новага аб’екта – дырэктар Ушацкай школы Віталь Іосіфавіч Клімашэўскі і дырэктар ДЮСШ Ігар Уладзіміравіч Клімашэўскі, начальнік аддзела адукацыі, спорту і турызму райвыканкама Іна Фёдараўна Сыроўчанка.

Дзіцячыя галасы не змаўкалі на пляцоўцы да позняга вечара. “Класнае поле!” – паказваючы вялікі палец усміхаецца адзін з самых маленькіх футбалістаў Аляксей Броўка. Для яго зусім не істотна, колькі мільёнаў затрачана на будаўніцтва і гэта, напэўна, правільна, бо ўкладаючы ў спорт, мы укладаем у бясцэннае – у здароўе дзяцей, а значыць і ў будучыню.

Д.Раманоўскі.