На пачатку тыдня ў рэдакцыю звярнуўся жыхар Арэхаўна Аляксей Уладзіміравіч Шарыпа, які прадэманстраваў набытыя на мінулым тыдні на рынку гарпасёлка пяць кілаграмаў насеннай бульбы сорту “Здабытак”, заплаціўшы за яе 85 тысяч рублёў. У прадпрымальніка, які, па яго словах, прадаваў насенне вытворчасці спецыялізаванага навуковапрактычнага цэнтра Нацыянальнай акадэміі навук Беларусі па бульбаводстве, дакументаў не запытаў – спяшаўся. Калі ж дома жонка высыпала бульбу з сеткі, каб падрыхтаваць да прарошчвання, то аказалася, што прыблізна палова насення мела зусім не “элітны” выгляд. “Я разумею, што пры затарцы або перавозцы некаторыя клубні могуць сапсавацца, але ж не ў такой колькасці!” – абураўся мужчына. Сапраўды, хаця і характарызуецца “Здабытак” устойлівасцю да хвароб, аднак у адсартаванай частцы многія клубні аказаліся з яўнымі прыкметамі гніення, механічнымі пашкоджаннямі або былі зусім дробнымі, больш падобнымі не на насенны матэрыял, а на “паранку”. Зараз мужчына чакае чарговага візіту прадпрымальніка на рынак (той нібыта ў пятніцу збіраўся гандляваць зноў) і замяніць сапсаваную бульбу на якасную або атрымаць грошы назад, бо насенне па факце атрымалася ўдвая даражэй, але чэка аб набыцці тавару мужчына не мае.
Каб бульба ў сетцы не аказалася “катом у мяшку” раім правяраць якасць тавараў адразу пасля пакупкі. Таксама вы маеце поўнае права запатрабаваць дакументы, якія пацвярджаюць паходжанне прадуктаў, сертыфікат якасці на іх. Калі ж у вас няма чэка, то ў адпаведнасці з Законам Рэспублікі Беларусь “Аб абароне правоў спажыўцоў” вы ўсё роўна зможаце вярнуць або замяніць няякасны тавар пры ўмове наяўнасці сведак яго набыцця.
Падрыхтаваў Д.Раманоўскі.
