Будоўля фізкультурнааздараўленчага комплексу “Юнацтва” ў гарпасёлку дае занятак не толькі частцы працаўнікоў нашай ПМК-66. На пачатковых этапах будаўніцтва розныя віды работ тут выконвалі нашы меліяратары і дарожнікі, а зараз дзякуючы гэтаму аб’екту маюць магчымасць зарабіць каля дзясятка іншых арганізацый. Даводзілася чуць, што “навошта прыцягваем чужых, няхай бы свае працавалі”. Але маштабы і тэрміны будаўніцтва ніяк не суадносяцца з магчымасцямі нашых зодчых – бывае, што за суткі на ўзвядзенні комплексу асвойваецца і трыста мільёнаў рублёў!
На мінулым тыдні тут працавалі і пры святле лямпаў – толькі а палове трэцяй гадзіны ночы працаўнікі Глыбоцкай ПМК48 скончылі заліўку бетоннай сцяжкі на другім паверсе ў будучай зале, дзе размесцяцца сталы для настольнага тэнісу, будзе памяшканне для дзюдаістаў. Для таго, каб не прастойваў бетонарукаў, на падвозе раствору з наваполацкага філіяла ААТ “Крычаўцэменташыфер” было задзейнічана восем адзінак тэхнікі, два магутныя міксеры “МАN” мелі нават мінскую “прапіску”.
– Выдзелены сродкі, таму стараемся максімальна хутка іх асвоіць, – тлумачыць дырэктар упраўлення капітальнага будаўніцтва Ушацкага раёна Аляксандр Сяргеевіч Лосеў, ведамства якога непасрэдна курыруе будоўлю фізкультурнааздараўленчага комплексу. – Ёсць неабходныя матэрыялы, людзі працуюць практычна без выхадных.
Па назвах працуючых на цяперашні момант на будоўлі арганізацый можна вывучаць геаграфію Віцебшчыны. Тут задзейнічаны тры брыгады Ушацкай ПМК-66 – муляры, тынкоўшчыкі і цеслярыбетоншчыкі. Побач з імі на кладцы і тынкоўцы сцен працуюць таксама работнікі Шаркоўшчынскай ПМК-68, дзяржаўнай будаўнічай арганізацыі з Пастаў, устаноўкай вакон займаюцца цесляры ПМК52 з Докшыц, а на даху шчыруюць работнікі прыватнай фірмы “ПлісаІнвест” з абласнога цэнтра.
Толькі сёлета на будаўніцтва фізкультурнааздараўленчага комплексу накіравана 6,4 мільярда рублёў з рэспубліканскага бюджэту і звыш 600 мільёнаў з мясцовых. У многім дзякуючы гэтаму аб’екту раён выконвае даведзены паказчык па інвестыцыях. Параўноўваючы лічбы, бачна, што адзін працэнт гатоўнасці фізкультурнааздараўленчага комплексу каштуе дзесьці каля мільярда рублёў – усяго за час узвядзення стратэгічнага аб’екта на гэтыя мэты затрачана звыш 40 мільярдаў, на сённяшні дзень ён гатовы на 40 працэнтаў.
Дзмітрый РАМАНОЎСКІ.
