З 1 студзеня 2016 года ўступілі ў сілу некаторыя нормы Указа Прэзідэнта краіны №570 “Аб удасканаленні пенсійнага забеспячэння”. Згодна з імі пры разліку пенсіі зараз будзе прымяняцца каэфіцыент да 5,0. Як нам патлумачыла начальнік упраўлення па працы, занятасці і сацыяльнай абароне Ушацкага райвыканкама С.П.Васілеўская, раней максімальны індывідуальны каэфіцыент, які ўжываецца для карэкціроўкі фактычнага заробку пенсіянераў пры вылічэнні пенсіі, быў устаноўлены на ўзроўні 4,0. Ад увядзення гэтай меры выйграюць тыя пенсіянеры, у якіх быў высокі заробак і індывідуальны каэфіцыент атрымаўся большы за 4,0, – удакладніла Святлана Пятроўна. Іншымі словамі, калі раней пенсіянеры з каэфіцыентамі 4,0 і 5,0 атрымлівалі аднолькавыя выплаты, то з 2016га памер пенсіі апошніх павялічыцца. Адзіны момант: гэта норма датычыцца тых, хто мае працяглы стаж работы: мужчыны – 36 гадоў і больш, жанчыны – ад 31 года.
У некаторых ушачан адразу ўзнікла пытанне: ці ўплываюць гады, якія пасля атрымання пенсіі адпрацаваў чалавек, на паказчыкі стажу для пераразліку. Так, Указам прадугледжана павелічэнне пенсіі работнікам, якія дасягнулі агульнапрынятага пенсійнага ўзросту і маюць працяглы стаж. За кожны поўны адпрацаваны год звыш 40 у мужчын і звыш 35 у жанчын да пенсіі будзе дадавацца адпаведна 0,1; 0,2; 0,3; 0,4; 0,5 працэнта сярэднямесячнага заробку, прынятага для вылічэння пенсіі. Гэтая норма ўжываецца да дасягнення 40 гадоў стажу ў жанчын і 45 гадоў – у мужчын.
Трэба адзначыць, што пенсіі, назначаныя да 1 студзеня 2016 года, ужо перагледжаны ў адпаведнасці з названымі нормамі Указа ў аўтаматычным рэжыме.
Падрыхтавала Кацярына КАВАЛЕЎСКАЯ.
