Змяніліся стаўкі дзяржаўнай пошліны на некаторыя паслугі, якія аказваюць дзяржаўныя інспекцыі па наглядзе за тэхнічным станам машын і абсталявання Мінсельгасхарча Рэспублікі Беларусь. Змяненні закранаюць як прадпрыемствы розных форм уласнасці, так і прыватных прадпрымальнікаў, фізічныя асобы, якія маюць ва ўласнасці калёсныя трактары, прычэпы і самаходныя машыны.
Калі раней атрымаць рэгістрацыйны знак каштавала 1 базавую велічыню, то зараз гэта працэдура каштуе 1,5 базавай. Не па 0,5, а па 1 базавай велічыні трэба плаціць за пасведчанне аб рэгістрацыі і тэхталон калёсных трактароў, прычэпаў, самаходных машын юрыдычных асоб і індывідуальных прадпрымальнікаў.
Значна ўзраслі тарыфы і на некаторыя іншыя віды ажыццяўляемых дзяржаўнай інспекцыяй працэдур. Трэба беражліва адносіцца да знакаў і дакументаў, бо рэгістрацыйны знак на калёсны трактар, прычэп, самаходную машыну замест страчанага зараз будзе каштаваць не дзве, а тры базавыя велічыні, выдача пасведчання трактарыста-машыніста – дзве базавыя замест адной, а пошліна за новы талон да пасведчання трактарыста-машыніста ўзрасла ў 10 разоў – з 0,05 да 0,5 базавай велічыні.
Выдача тэхнічнага талона на калёсны трактар, прычэп да яго, самаходную машыну юрыдычных асоб і індывідуальных прадпрымальнікаў у выпадку ўнясення змяненняў у дакументы, звязаныя з дзяржаўнай рэгістрацыяй, абыдзецца ў 2 базавыя велічыні.
Павысіліся пошліны і на некаторыя віды дублікатаў: пасведчання аб рэгістрацыі калёснага трактара, прычэпа, самаходнай машыны (тэхнічнага пашпарта), тэхталона – да 1,5 базавай велічыні. Кошт абмену пасведчання аб рэгістрацыі калёснага трактара, прычэпа да яго, самаходнай машыны (тэхнічнага пашпарта) узрос з 0,5 да адной базавай велічыні.
Экзамены таксама лепш здаваць з першага разу, бо тарыфы на іх прыём дзяржінспекцыямі павялічыліся ўдвая: здача правілаў дарожнага руху і тэхнічнай эксплуатацыі зараз каштуе па 0,1 базавай велічыні, экзамену па кіраванні калёснымі трактарамі, самаходнымі машынамі – 0,2 базавыя велічыні.
Стаўкі пошліны на правядзенне дзяржінспекцыямі дзяржаўнага тэхнічнага агляду таксама ўзраслі і зараз кошт працэдуры тэхагляду адзінкі калёснага трактара, самаходнай машыны каштуе 0,3, прычэпа да калёснага трактара – 0,2 базавыя велічыні. Таму кіраўнікам і інжынерным службам гаспадарак раю надаць асаблівую ўвагу якаснай падрыхтоўцы тэхнікі да планавага тэхагляду, каб потым не пераплачваць за паўторны.
І.ПУХАЛЬСКІ, начальнік раённай інспекцыі Дзяржтэхнагляда.
