“Вы ж не забудзеце зазірнуць на склад нашай прадукцыі? Мы новую партыю бялізны пашылі – такія расфарбоўкі арыгінальныя!” – падобнымі словамі літаральна штораз сустракаюць мяне на Ушацкім прамкамбінаце, калі даводзіцца бываць там па журналісцкіх справах. І, прызнаюся, рэдка калі выходжу адтуль без чарговай пакупкі. Магчыма і дзешавейшыя пасцельныя камплекты на тым жа рынку, але набытыя на нашым камбінаце гадамі не зношваюцца, не губляюць колеру пасля мыцця, бо выраблены з выключна якаснай сыравіны.
– У асноўным для пашыву бялізны выкарыстоўваецца бязь, – расказвае начальнік швейнага цэха Алена Казьяніна. – Але нядаўна мы пачалі шыць шыкоўныя двухспальныя камплекты з папліну і паркалю – тканіны, якія закупляем на віцебскім прадпрыемстве “Тэхналіт”, маюць яркія насычаныя колеры, яны трывалыя, як і бязь, аднак яшчэ больш гладкія, бліскучыя, вельмі прыемныя да цела. Паплін мае яшчэ адзін важкі плюс – тканіна амаль не мнецца, ну а камплекты з паркалю ў Еўропе адносяць да класу “люкс”.
Зрэшты, калі набываць вырабы непасрэдна на прамкамбінаце, без гандлёвай надбаўкі, яны абыдуцца дзешавей. Зусім нядорага тут каштуюць вафельныя ручнікі, можна таксама купіць насыпкі, пледы. Якасць сваёй прадукцыі ўшацкія прамыслоўцы гарантуюць.
Наталля БАГДАНОВІЧ.
На здымку: закройшчык Т.Міцкевіч з узорамі прадукцыі.
