У мінулую суботу ў спартыўным жыцці нашага раёна адбылася знамянальная падзея: упершыню ва Ушачах была праведзена гульня чэмпіяната Рэспублікі Беларусь. Паядынак жаночых гандбольных каманд “Віцябчанка” і “Гомель” выклікаў вялікую цікавасць у гледачоў, якія практычна запоўнілі залу комплексу “Ушачы-Юнацтва”. І хоць асаблівай інтрыгі ў процістаянні не атрымалася – гамяльчанкі, у складзе якіх некалькі ігракоў нацыянальнай зборнай, адолелі маладую каманду горада на Дзвіне з лікам 14:38 – гледачы з захапленнем паглядзелі гульню, а гандбалісткі і трэнеры засталіся задаволенымі арганізацыяй сустрэчы. Галоўным жа вынікам гэтай падзеі можна лічыць тое, што, як адзначылі на афіцыйным сайце Беларускай федэрацыі гандбола, “на карце гандбольнай Беларусі з’явілася новая кропка”.