“Чорным аўторкам” можна назваць дзень гэтага тыдня, калі адразу з дзвюх вёсак Ушацкага сельсавета прыйшлі трагічныя звесткі пра тое, што іх жыхары – мужчыны сярэдніх гадоў і прадпенсійнага ўзросту – скончылі жыццё самагубствам. Усяго ж з пачатку года ў нашым раёне зарэгістравана пяць суіцыдаў.
Калі аналізуеш такія выпадкі, міжволі задаешся пытаннем: чаму адны гадамі змагаюцца з цяжкай хваробай, даражаць кожным днём і ўсё ж заўчасна паміраюць, а другія, здаровыя і моцныя, ідуць на той свет па сваёй волі?
Адпаведна статыстыцы, у большасці краін свету крывая самагубстваў паўзе ўверх і менавіта яны выходзяць на першыя месцы сярод прычын смерці ў мірны час. Востра стаіць гэта праблема і ў Беларусі. Прычыны суіцыдаў самыя розныя: сямейныя канфлікты, здрады, безадказная любоў, страта блізкага чалавека, адзіноцтва, неразуменне, хваробы і псіхічныя расстройствы. І амаль заўсёды пералічанае падмацоўваецца вялікай дозай выпітага алкаголю – так было літаральна ва ўсіх сёлетніх выпадках.
Спіртное стала штуршком і ў спробе, якую здзейсніў не так даўно 16-гадовы жыхар яшчэ адной ушацкай вёскі. Ён ва ўсіх адносінах быў добранадзейным хлопцам: няблага вучыўся, дапамагаў бацькам па гаспадарцы, у вольны час падзарабляў і нават сам зрабіў рамонт у сваім пакоі. Уся гэтая ідылія рухнула адначасна, калі каханая дзяўчынка выбрала сабе другога кавалера. Юнацкі максімалізм, прыхаваная мамай да свята бутэлька, знойдзеная ў шафе, – і “геніяльнае” рашэнне, якое ажыццявіў, паласнуўшы лязом па запясці… На шчасце, дамоў вельмі своечасова вярнуўся бацька і хлопца ўдалася выратаваць. А праз некаторы час у размове з намі ён прызнаваўся: “Разумею, што паступіў бязглузда. Не ведаю, што на мяне найшло. Зараз бы ні ў якім разе так не зрабіў!”
Разважаючы пра гісторыі, калі здаровыя людзі гінуць у росквіце сіл ад прычын, якія прынята называць знешнімі, нельга не закрануць і яшчэ адзін аспект. Фактычна, да тых жа самагубстваў можна аднесці смерці ад перадазіроўкі алкаголем. Выпадкі, калі арганізм не справіўся з перапрацоўкай улітых у яго праміле, сёлета ў раёне рэгістраваліся тройчы, сярод памерлых адна жанчына. Прычым, падкрэслю, загінулі гэтыя людзі не ад атручвання няякасным алкаголем, а менавіта з-за перабору звычайнага. Так, напрыклад, абарвалася жыццё 44-гадовага жыхара адной з вёсак Вяркудскага сельсавета. Выпіўшы гіганцкую дозу спіртнога, мужчына заснуў на аўтобусным прыпынку. Там яго знайшоў брат, давёў да хаты і паклаў у ложак, вось толькі раніцай чалавек не прачнуўся. Эксперты прызналі прычынай смерці вострае атручванне этылавым спіртам: яго ўзровень у крыві нябожчыка складаў 6,8 праміле! Адметна, што ўжо 3-4 праміле з’яўляюцца паказчыкам цяжкога алкагольнага атручвання, смяротны зыход у дарослых выклікае 5, а ў падлеткаў – 4 праміле. Інакш кажучы, да гібелі мужчыну сярэдняга целаскладу могуць прывесці выпітыя на працягу шасці гадзін 1-1,3 літра гарэлкі. Ушачанін жа паставіў сапраўдны рэкорд, вось толькі ў кнігу Гіннеса яго занясуць наўрад ці…
Памерлых не ўваскрэсіць. Адматаць назад жыццё не атрымаецца. Але можна яшчэ націснуць на паўзу тым, хто няўмольна плыве да бездані.
М.ПАДВОРНЫ, пракурор Ушацкага раёна.
