Ушачское районное объединение профсоюзов подвело итоги работы за год. Какая «первичка» признана лучшей, читайте здесь!

В общественных организациях

На мінулым тыдні адбылося пасяджэнне савета раённага аб’яднання прафсаюзаў, на якім былі падведзены вынікі работы за 2018 год, вызначаны планы на сёлетні, узнагароджаны пераможцы конкурсу на лепшую пярвічную арганізацыю, а таксама лепшы прафсаюзны інфармацыйны стэнд. У мерапрыемстве прынялі ўдзел намеснік старшыні райвыканкама Алена Васільеўна Пашковіч, загадчык аддзела сацыяльнага партнёрства і працоўных адносін Віцебскага абласнога аб’яднання прафсаюзаў Уладзімір Іванавіч Аспанаў, кіраўнікі раённых грамадскіх аб’яднанняў і, зразумела, лідары пярвічак і галіновых прафсаюзаў.

І наймальнікам патрэбна дапамога
– Задавальненне адчуваеш, калі сумеў рэальна дапамагчы, – аналізуе паўгадавы перыяд сваёй работы старшыня раённага аб’яднання Марыя Аляксееўна Шаўчэнка. – І гэта адбываецца не толькі тады, калі прыходзяць ці тэлефануюць людзі. Сёлета да мяне напрамую звярнулася чатыры чалавекі і іх пытанні вырашаны станоўча. Дзякуючы садзейнічанню камісіі па санаторна-курортным лячэнні дваім прапанаваны пуцёўкі на аздараўленне: адзін чалавек ужо скарыстаўся “гарачай”, другі паедзе праз некалькі месяцаў. Разам з абкамам прафсаюзаў работнікаў аграпрамысловага комплексу, да якога адносіцца пярвічка прадпрыемства меліярацыйных сістэм, дапамаглі знізіць аплату пенсіянерцы, якая пражывае ў галіновым інтэрнаце. Падобныя пытанні няпростыя, спачатку вывучылі заканадаўства, звярнуліся да дырэктара прадпрыемства В.С.Спірчонка і знайшлі прымальны варыянт.

Нехарактэрна, калі ў прафсаюз за дапамогай звяртаецца наймальнік. Аднак быў летась і такі выпадак. Новы кіраўнік “Агра-Селішча” А.Ю.Анецька сам ініцыіраваў, каб работнікі калектыву атрымалі навагоднія падарункі, цікавіўся, як гэта зрабіць правільна. І вельмі прыемна, што селішчанцы мелі нагоду лішні раз парадавацца.
Пераканалася, што пытанні існуюць і ў прафоргаў, і ў работнікаў, і нават у адміністрацыі. І прыведзеныя вышэй прыклады сведчаць, што рашыць сумесна можна вельмі многае, не трэба толькі баяцца праблем, замоўчваць іх.
А яшчэ ў мяне перад вачыма камбайнеры нашых сельгаспрадпрыемстваў у разгар жніва. Першы раз – у шлёпанцах, якія слізгаюць і лёгка злятаюць з нагі. Другі – ужо ў басаножках, са сродкамі барацьбы з агнём на тэхніцы. Мабыць і злаваліся хлопцы першы раз, маўляў, чапляемся “да дробязяў”, але я рада, што наш сумесны са спецыялістамі па ахове працы рэйд дапамог пазбегнуць траўматызму.

Выбары і прысяга прафсаюзнага лідара
М.А.Шаўчэнка звярнула ўвагу на тыя перамены, якія чакаюць грамадскае аб’яднанне сёлета. Па-першае, гэта справаздачна-выбарная кампанія. Марыя Аляксееўна назвала прыкладныя тэрміны, калі адбудуцца канферэнцыі ў галіновых прафсаюзах, і падкрэсліла, што да гэтага часу пабывае на перавыбарных сходах у пярвічках. Усім новаабраным лідарам у лістападзе давядзецца абіраць старшыню раённага аб’яднання прафсаюзаў – з 2019 года гэтая пасада становіцца выбарнай. Каму адстойваць інтарэсы працоўных – вырашаць менавіта ім.
Паралельна з гэтай істотнай пераменай Федэрацыя прафсаюзаў Беларусі ініцыіравала і шэраг іміджавых. Цяпер у аб’яднання з’явілася свая прысяга, якую, як клятву Гіпакрата, будзе прымаць перад калектывам лідар прадпрыемства.
А яшчэ сёлета прафсаюзы правядуць шмат мерапрыемстваў, прысвечаных 75-й гадавіне вызвалення Беларусі і 115-й – утварэння прафсаюзнага руху.

Чый дагавор працуе?
Паглядаючы адзін на аднаго, уважліва слухалі прысутныя выступленне старшыні прафсаюзнай пярвічкі лясгаса В.В.Шах. Хоць і сказала Валянціна Віктараўна, што не рыхтавалася грунтоўна, але хвілін дваццаць пералічала льготы, якімі карыстаюцца лесаводы. Толькі летась на аказанне матэрыяльнай дапамогі, удзешаўленне пуцёвак, шанаванне юбіляраў і іншыя заахвочванні зрасходавана 172 тысячы рублёў. Не толькі прафсаюзныя грошы, іх не хапіла б, а яшчэ і сродкі з прыбытку прадпрыемства ідуць на стымуляванне сваіх работнікаў. І ведала ўсё гэта без паперы галоўны эканаміст прадпрыемства таму, што прапісаныя ў калектыўным дагаворы палажэнні сапраўды працуюць. “Запрашаем 11 сакавіка рэдакцыю разам з намі на шанаванне Заслужанага лесавода Беларусі Алега Мікалаевіча Рахманенкі. Мы ўсіх ветэранаў вытворчасці віншуем з круглымі датамі, ну а для такіх, асабліва заслужаных – у нас іх два – прадугледжаны дадатковыя штомесячныя выплаты,” – яе зварот у канцы пасяджэння быў толькі пацвярджэннем сказанаму.
Пярвічка лясгаса заняла трэцяе месца ў раённым аглядзе-конкурсе, хаця магла б быць і ў лідарах. Прафсаюзная арганізацыя аддзела ідэалагічнай работы, культуры і па справах моладзі (старшыня В.У.Літвін, якую зараз замяніла І.В.Байрамава), а таксама бальніцы (М.Г.Харэвіч), якія аказаліся адпаведна на другім і першым, апярэдзілі таму, што быў рывок адносна папярэдняга года і ўзорна вядзецца дакументацыя.
Таксама дыпломамі і кветкамі былі ўзнагароджаны старшыні пярвічак, якія маюць лепшыя інфармацыйныя стэнды. Трэцяя месца атрымаў Д.В.Іваненка з ПМК-66, другое – Т.М.Васілеўская з ясляў-сада №2, а першае зноў В.У.Літвін.

За працяглыя кантракты
Якія задачы акрэсліла для сябе аб’яднанне прафсаюзаў на наступны год. Канечне, стаяць на варце інтарэсаў працоўных: у выплаце зарплат, ахове працы, больш працяглых кантрактах, павелічэнні пярвічак і колькасці іх членаў. На апошніх дзвюх тэмах акцэнтаваў увагу У.І.Аспанаў, прыгадаўшы, што за апошні год у вобласці створана 161 прафсаюзная пярвічка, з іх 111 – у недзяржаўным сектары, у 164 арганізацыях упершыню заключаны калектыўныя дагаворы, а 674 грамадзянам прафсаюзы дапамаглі вярнуць 538 тысяч рублёў – незаконна ўтрыманых або нявыплачаных. Уладзімір Іванавіч цікавіўся і колькасцю кароткатэрміновых кантрактаў, прыгадаўшы, што Федэрацыя прафсаюзаў Беларусі ініцыіруе заключэнне з добрасумленнымі работнікамі іх на максімальны, пяцігадовы тэрмін.
Алена Васільеўна Пашковіч звярнулася да прысутных з такімі злабадзённымі пытаннямі, як антыалкагалізацыя насельніцтва, ахова дзяцей, аказанне рэальнай дапамогі тым, хто побач.

Вольга Караленка.



Добавить комментарий

Ваш e-mail не будет опубликован. Обязательные поля помечены *