Паважаныя работнікі нафтавай, газавай і паліўнай прамысловасці!
Сардэчна віншую вас з прафесійным святам.
Ролю вашай сферы для жыцця грамадства немагчыма пераацаніць. Дзякуючы вашай няпростай працы ў дамы жыхароў Ушаччыны прыходзяць цяпло і святло, а прамысловасць і транспарт атрымліваюць неабходную для паспяховай работы энергетычную сыравіну.
Упэўнены, што прафесіяналізм, стараннасць і руплівасць, уласцівыя работнікам вашай галіны, і ў далейшым дазволяць плённа выконваць няпростую і надзвычай адказную місію.
Работнікам і ветэранам сферы жадаю моцнага здароўя, асабістага шчасця, поспехаў ва ўсім, што вы робіце для развіцця раёна і нашай краіны.
Старшыня Ушацкага раённага выканаўчага камітэта У.Г.АЎДОШКА.
На самым адказным участку
Звычайна, рыхтуючы артыкул пра пэўнага працаўніка, журналісты папярэдне ўзгадняюць свой выбар з адміністрацыяй арганізацыі, удакладняюць, ці заслугоўвае чалавек быць адзначаным праз газету. У выпадку з работнікамі Ушацкага раёна газазабеспячэння такія працэдуры проста залішнія: абсалютна кожны член гэтага калектыву варты старонак выдання. Глыбокія спецыяльныя веды, адказнасць і дысцыпліна, добразычлівасць і ўраўнаважанасць – без спалучэння гэтых якасцяў немагчыма стаць супрацоўнікам газавай службы. І ўсе яны ўласцівыя слесару аварыйна-аднаўленчых работ А.М.Ляхаву.
Анатоль Мікалаевіч з’яўляецца адным са старажылаў прадпрыемства, якому аддаў больш двух дзясяткаў год. Нарадзіўся ён у Рагачоўскім раёне, пасля школы вывучыўся на вадзіцеля і механізатара, а ў арміі атрымаў спецыяльнасць аўтаэлектрыка. Знайшоў сваю палавінку, нарадзілася двое дзетак, але лёс маладой сям’і, як і многіх іншых на Гомельшчыне, перайначыў выбух Чарнобыля. Мясцовасць, дзе жылі Ляхавы, абавязковаму перасяленню не падлягала, аднак у хваляванні за здароўе дзяцей яны вырашылі пераехаць. У наш раён трапілі, бо тут жылі родныя, а тагачасны дырэктар саўгаса “Ушацкі” Уладзімір Мікалаевіч Круглік прапанаваў сям’і катэдж у Двор Пліне. У гаспадарцы Анатоль адпрацаваў некалькі год, а ў 2000-м вока на перспектыўнага работніка паклаў яшчэ адзін Уладзімір Мікалаевіч – Малаткавец: дырэктар райгаза шукаў талковага электрыка-акумулятаршчыка для даволі вялікага на той час аўтапарка. Спецыфічныя навыкі Анатоль атрымаў у “ГАЗ-ІНСТЫТУЦЕ” – дарэчы, работнікі службы вучацца на працягу ўсёй сваёй кар’еры, кожныя тры гады абнаўляюць веды і здаюць экзамены.
У цяперашні час А.Ляхаў працуе на адным з самых адказных участкаў – у аварыйнай службе. У брыгадзе сабраны сапраўдныя ўніверсалы, якія спецыялізуюцца ў ліквідаванні аварый, аднак могуць выконваць усе віды работ. На шчасце, надзвычайных сітуацый, калі аварыйшчыкам даводзіцца праяўляць сваё майстэрства, бывае няшмат. Але ўсё ж яны здараюцца: так, некалькі год таму ў час земляных работ быў пашкоджаны газаправод у мікрараёне вуліцы Е.Лось гарпасёлка – пра праблему газавікам адразу падказала падзенне ціску ў сістэме, і брыгада тэрмінова выехала на месца. “У той дзень мы з напарнікам Яўгенам Ляхоўскім выконвалі работы ў Вялікіх Дольцах, і калі паступіў сігнал – літаральна прыляцелі ва Ушачы. Каб ухіліць аварыю, давялося адключыць усю ветку зарэчча, аднак месца парыву хутка было знойдзена і ўжо праз паўтары гадзіны мы аднавілі газазабеспячэнне”, – прыгадвае слесар.
Усе газавікі – універсалы і пры вытворчай неабходнасці выконваюць работу розных службаў. Вось і падчас нядаўняй паездкі па раёне мы сустрэлі слесараў І.Пятніцу і В.Клачка, якія ў гэты дзень займаліся дастаўкай балонаў.
Прысутнічаюць газавікі і пры інцыдэнтах, што датычацца сумежных службаў: выязджаюць на пажары, а нядаўна, напрыклад, брыгадзе давялося кантраляваць работу водаканалаўцаў, якія ўхілялі парыў на вуліцы Н.Касцючэнкі ва Ушачах, бо існавала пагроза пашкоджання газавых камунікацый.
Працу спецыялістаў службы аблягчаюць сучасныя тэхналогіі: зараз можна дыстанцыйна адсочваць работу газаразмеркавальных станцый і выязджаць туды толькі пры пагрозе ўзнікнення аварыйных сітуацый, а з дапамогай лазара на вялікай адлегласці знаходзіць крыніцу ўцечкі. Дарэчы, не кожнае паведамленне людзей, якія пачулі “пах газу”, пацвярджаецца: нядаўна, напрыклад, трывожны сігнал паступіў са шматпавярхоўкі на Садовай, аднак прыбор адразу засведчыў, што пах мае іншае паходжанне. У такіх выпадках, канечне, газавікі грамадзян не папракаюць, бо пільнасць заўсёды пахвальная.
Да слова, уменне знайсці кантакт нават з самым нядружалюбным кліентам – абавязковае патрабаванне да работнікаў службы. “Трэба быць ветлівым і ведаць адказ на любое пытанне – напрыклад, дзе лепш купіць пліту ці як перанесці газавы лічыльнік. А іншы раз проста выслухаць вясковую бабулю, якой няма з кім пагутарыць, – так і заваёўваем прыхільнасць!” – усміхаецца Анатоль Мікалаевіч. Дарэчы, увесь час нашай размовы ён быў бадзёрым і пазітыўным – і толькі напрыканцы прызнаўся, што адпрацаваў начную змену і парадкам стаміўся.
Службы розныя – задача адзіная
Заўтра прафесійнае свята адзначаць 39 работнікаў Ушацкага раёна газазабеспячэння філіяла вытворчага ўпраўлення “Полацкгаз”. Менавіта гэты ўмелы і згуртаваны калектыў адказвае за звыклыя для нас бытавыя выгоды, дбае пра тое, каб блакітнае паліва несла ў дамы толькі цеплыню і камфорт.
Усе службы прадпрыемства дзейнічаюць эфектыўна і зладжана. Самай вялікай па колькасці работнікаў з’яўляецца аварыйна-дыспетчарская, дзе працуюць 15 чалавек. “Калі прыехаў ва Ушачы, быў уражаны ўзроўнем мясцовых работнікаў. Літаральна ўсе: начальнік Леанід Віктаравіч Рудак, галоўны інжынер Дзмітрый Васільевіч Карэйша, слесары, вадзіцелі – моцныя спецыялісты сваёй сферы, з якімі можна вырашаць любыя задачы”, – адзначае майстар Ягор Шульчанка, які з пачатку бягучага года ўзначальвае аварыйную службу. Дарэчы, пацвярджэннем гэтых слоў стаў чарговы поспех нашых землякоў на абласных спаборніцтвах аварыйных брыгад: у фінале, які праходзіў у Віцебску, каманда ў складзе Аляксандра Дразда і Андрэя Мялешкі заняла сёлета трэцяе месца. Сапраўдным універсалам з’яўляецца вадзіцель службы Андрэй Шыхель, які да свята атрымаў высокую ўзнагароду – Ганаровую грамату УП “Віцебскаблгаз”.
◆ У зоне адказнасці ўшацкіх спецыялістаў больш 95 кіламетраў газавых сетак, 3 газарэгулятарныя і 11 шафавых рэгулятарных пунктаў, 2670 карыстальнікаў прыроднага газу і 3641 – звадкаванага.
Пяць работнікаў прадпрыемства займаюцца ўнутрыдамавым газавым абсталяваннем – устанаўліваюць і абслугоўваюць газавыя пліты, воданагравальныя калонкі і катлы. Узначальвае службу вопытны майстар Ігар Швейкус. Важнай “баявой адзінкай” брыгады з’яўляецца электрагазазваршчык 6 разраду Юрый Саўчанка, майстэрства якога сёлета адзначана Ганаровай граматай філіяла ВУ “Полацкгаз”. У пары з ім звычайна працуе слесар Канстанцін Лёля, і гэты дуэт майстар службы жартам называе “нашы медыйныя персоны” – работнікі заўсёды на віду: праводзяць мантаж газавага абсталявання, выконваюць заяўкі па рамонце пліт і ўстаноўцы новых – дарэчы, за год іх мяняюць 250-300 ушацкіх сем’яў. Пад увагай службы знаходзяцца 884 абаненты, якія ацяпляюцца прыродным газам, а непасрэдна на абслугоўванні ўшацкіх газавікоў 546 катлоў. За гэты складаны сектар адказвае слесар Віктар Селезень, які да свята атрымаў Падзяку філіяла. Асвойвае нюансы справы і яго малады калега Віктар Клачок.
Паспяхова спраўляюцца з абслугоўваннем і рамонтам вонкавых газаправодаў Сяргей Шчэкачыхін, Уладзімір Пузатка і Ігар Пятніца (ён таксама адзначаны сёлета Падзякай філіяла). “Работа нашай службы не надта бачная, аднак надзвычай важная для бесперабойнага абслугоўвання спажыўцоў, – падкрэслівае майстар Кірыл Гусёнак. – На бліжэйшы час маем шмат планаў па мадэрнізацыі: будзе цалкам заменена абсталяванне на газаразмеркавальным пункце №3, што побач з вытворчай базай, шафавым размеркавальным пункце ў канцы вуліцы Савецкай”. У веданні майстра і служба дастаўкі звадкаванага газу. Штодзень яе работнікі развозяць па раёне да паўсотні балонаў, пакрываючы каля 200 кіламетраў дарог.
І канечне, нельга абыйсці ўвагай тэму добраўпарадкавання, у якім ушацкае прадпрыемства традыцыйна знаходзіцца сярод лідараў “Віцебскаблгаза”. Шчыруе ў навядзенні прыгажосці ўвесь калектыў, але самы вялікі ўклад уносіць кладаўшчык Святлана Дрозд, прозвішча якой да свята занесена на Дошку гонару філіяла “Полацкгаз”.
Наталля БАГДАНОВІЧ.
