За незаконнае паляванне прыйдзецца адказваць перад законам жыхару Ушач. 27 снежня на тэрыторыі паляўнічых угоддзяў Ушацкага лясгаса ён застрэліў самку лася. Пры гэтым ніякіх дакументаў, дазволу не меў і наогул не з’яўляецца паляўнічым.
Парадавацца такой здабычы грамадзянін нават не паспеў, бо трапіў у поле зроку работнікаў лясгаса, якія якраз у гэты час праводзілі рэйдавыя мерапрыемствы. Сумесна з прадстаўнікамі раённай арганізацыйнай структуры Беларускага таварыства паляўнічых і рыбаловаў мужчына быў затрыманы. У цяперашні час вядзецца следства.
