На мемориальном комплексе «Прорыв» в торжественной обстановке 40 военнослужащих внутренних войск приняли военную присягу

Общество

Прыняцце прысягі – момант асаблівы. Назаўсёды запомняць гэты рытуал 40 ваеннаслужачых унутраных войск, якія клятву на вернасць Радзіме давалі на мемарыяльным комплексе “Прарыў”. У Год гістарычнай памяці асабліва сімвалічна і пачэсна.

Летась 7-я асобная спецыяльная міліцэйская брыгада ўпершыню прымала навабранцаў у свае рады на нашым “Прарыве”, а сёлета было вырашана зрабіць гэта традыцыяй.

У суботу яшчэ задоўга да афіцыйнага пачатку мерапрыемства на мемарыял прыбывалі дзясяткі аўтамабіляў – пабачыць сваіх салдатаў і раздзяліць урачыстасць ехалі родныя і сябры з розных куткоў нашай краіны. Многія з іх, дарэчы, на “Прарыве” былі ўпершыню.

Кіраўніцтва ваеннай часці, упраўлення ўнутраных спраў аблвыканкама, ветэраны ўнутраных войск і прадстаўнікі грамадскіх арганізацый віншавалі навабранцаў і выказвалі спадзяванне, што папаўненне будзе годна прадаўжаць традыцыі сваіх дзядоў і бацькоў, верна служыць Айчыне. Вітаў гасцей на гераічнай Ушаччыне і кіраўнік раёна С.С.Садоўскі: “Служба ва Узброеных сілах заўсёды была добрай жыццёвай школай, часам узмужнення, гэта нялёгкія ўрокі, але яны ідуць на карысць. Няхай вашы дзеянні спрыяюць падтрыманню бяспечнай абстаноўкі, спрыяльнай для працы і адпачынку ўсіх беларусаў. Мірных вам будняў і здароўя”. Божай дапамогі падчас нясення воінскай службы пажадаў благачынны Ушацкай царкоўнай акругі іерэй айцец Аляксандр Таляронак і акрапіў новае папаўненне святой вадой.

А.Клопаў з маці.

“Цяжка перадаць пачуцці, якія зараз мяне перапаўняюць – і хваляванне, і гонар, і адказнасць. Прызыўнікі прыкметна змяніліся з таго моманту, як мы іх адпраўлялі ад ваенкаматаў, форма ім да твару. Хоць і прыйшлося пераадолець кіламетры, аднак тут, на вашым “Прарыве” незвычайная атмасфера. І гэта самы лепшы ўрок патрыятычнага выхавання”, – падзялілася мама аднаго з навабранцаў Алена Мікалаеўна Жокіна.

За месяц папаўненне ваеннай часці 5524, што дыслацыруецца ў Віцебску, спазнала агульнавайсковыя асновы, атрымала веды па агнявой, медыцынскай падрыхтоўцы. Салдаты так зладжана маршыравалі на мемарыяле, што адразу кожны пераконваўся – першы вучэбны этап іх службы прайшоў паспяхова. І калі большасць хвалявалася, то ўраджэнец аграгарадка Кублічы Аляксандр Клопаў на роднай зямлі адчуваў сябе ўпэўнена. Да службы ў арміі ён паспеў атрымаць спецыяльнасць мікраэлектроніка ў Мінскім політэхнічным каледжы – філіяле БНТУ. У Аляксандра, а таксама яшчэ аднаго ўраджэнца нашага раёна Аляксандра Смаргуна ў гэты дзень, несумненна, былі самыя вялікія групы падтрымкі – на мемарыял прыехалі як родныя, так і сябры, якія не хавалі эмоцый і слёз радасці ад сустрэчы.

Назіралі за рытуалам не толькі ганаровыя госці, бацькі ваеннаслужачых, а і юнае пакаленне: на мемарыяле прысутнічалі прадстаўнікі ваенна-патрыятычных клубаў вобласці, вучні Ушацкай і Ільюшынскай школ.

Фіналам мерапрыемства сталі паказальныя выступленні спецыялістаў-кінолагаў і ўзвода спецыяльнага назначэння, якія прадэманстравалі, як затрымліваюць пешых злачынцаў і тых, хто перамяшчаецца на машыне. Свае ўменні паказалі і юныя прадстаўнікі ваенна-патрыятычнага клуба “Сокал” з Наваполацка. А вайскоўцы духавога аркестра вайсковай часці 5530 устроілі невялікі канцэрт. Радасным момантам для галоўных герояў прысягі стала атрыманне першай за час службы звальняльнай, якую яны правялі на Ушаччыне.

Вольга КАМАРКОВА.



Добавить комментарий

Ваш e-mail не будет опубликован. Обязательные поля помечены *