Ушачская детская школа искусств приглашает на учебу

Культура

Заўтра вясёлым гоманам і гукамі мелодый напоўняцца ўжо паспеўшыя засумаваць ад летняй цішыні класы Ушацкай дзіцячай школы мастацтваў. Якім будзе чарговае падарожжа па шляху творчых адкрыццяў? Пра гэта расказвае дырэктар установы Наталля Вячаславаўна ІВАНОВА.

На занятках мастацкага аддзялення.

– Адразу ж хачу шчыра павіншаваць вучняў, іх бацькоў і педагогаў з пачаткам новага навучальнага года. Паважаныя таты і мамы, паспрыяўшы прыходу мастацтва ў жыццё вашых дзетак, вы прынялі цалкам правільнае рашэнне. Агульнавядома, што людзі, якія займаліся музыкай і іншымі відамі мастацтва, маюць больш шансаў на жыццёвы поспех. Так, Альберт Эйнштэйн быў цудоўным скрыпачом, Кандаліза Райс выдатна грае на фартэпіяна, а ў Марыны Цвятаевай ёсць аўтабіяграфічная аповесць “Мама і музыка”. Адным словам, “творчы багаж” спатрэбіцца ўсім: матэматыкам, фізікам, журналістам і нават праграмістам. Дарэчы, кампанія Майкрасофт аддае перавагу супрацоўнікам з музычнай адукацыяй, бо ўзровень структурнага мыслення ў іх прыкметна вышэй, чым у нятворчых людзей. Таму бацькам, якія яшчэ вагаюцца, раю адкінуць сумненні – яшчэ ёсць крыху часу, каб паспець падаць заяўленне на навучанне вашых дзетак у школе мастацтваў.

Умовы ж для заняткаў, як вы ведаеце, у нас проста выдатныя, а літаральна ўсе педагогі – моцныя спецыялісты, шчыра захопленыя сваёй справай. Прыемна, што сёлета нам удалося не толькі амаль цалкам захаваць калектыў, а і ўзмацніць яго адметнымі прафесіяналамі.

Хачу сказаць, што не бывае дзяцей, у якіх зусім няма творчых схільнасцяў: проста, трэба правільна іх вызначыць і ўмела развіць. Зрабіць гэта дазваляе шырокі мастацкі дыяпазон нашай школы. У гэтым навучальным годзе музычны напрамак будзе прадстаўлены навучаннем ігры на фартэпіяна, баяне, акардэоне, цымбалах, домры, балалайцы, гітары, а таксама харавым і эстрадным (вакал) аддзяленнямі. Традыцыйна ў школе будуць развіваць свае таленты юныя мастакі і танцоры. Добра зарэкамендаваў сябе і новы напрамак, дзе вучні з цікавасцю асвойваюць лічбавае музычнае мастацтва і камп’ютарную графіку. Па-ранейшаму ігры на фартэпіяна, цымбалах, домры, балалайцы і гітары можна будзе навучацца ў філіялах у аграгарадках Глыбачка і Арэхаўна.

Падчас канцэрта.

Будуць сёлета і наватарствы. Безумоўна, такі выдатны аб’ект, які дзяржава падарыла нашаму невялікаму райцэнтру, трэба выкарыстоўваць з максімальнай аддачай. А таму (вядома ж, не ва ўрон асноўнай дзейнасці) мы мяркуем аказваць і дадатковыя паслугі. Так, пазабюджэтнае аддзяленне “Аматарскае музіцыраванне” прапануе ўсім жадаючым (як дзецям, так і дарослым) браць індывідуальныя ўрокі вакала, ігры на гітары, фартэпіяна, баяне, а таксама рэпетытарства па тэорыі і спецыяльнасці для паступаючых у профільныя навучальныя ўстановы. Пры гэтым можна заказаць адзін занятак, узяць абанемент на месяц ці прайсці паскораны трохмесячны курс навучання. Не пакінем мы па-за ўвагай аматараў малявання і харэаграфіі. Для першых прадугледжаны індывідуальныя заняткі, для другіх – групавыя. А для дарослых адкрыецца студыя “Усходнія танцы”, заняткі ў якой будзе весці спецыяльна запрошаны харэограф. Напэўна, залішне казаць, наколькі гэта мастацтва папулярнае ў свеце – што і нядзіўна, бо яно робіць жанчын яшчэ больш прывабнымі і ўпэўненымі ў сабе, уздымае настрой і ўмацоўвае здароўе. Мяркуем, што зацікавіць ушачан і магчымасць асвоіць 3D-графіку, графічны дызайн. Канкрэтную інфармацыю можна атрымаць па нумары 5-77-49.

Не будзе пуставаць сёлета і цудоўная канцэртная зала: плануем запрашаць ушачан і гасцей на шэраг самых розных мерапрыемстваў. Такім чынам, спадзяемся, што наша школа будзе папулярным цэнтрам культурнага жыцця Ушаччыны.



Добавить комментарий

Ваш e-mail не будет опубликован. Обязательные поля помечены *