Сёння кожны з нас цэніць свой час, а калі проста не мае яго на тое, каб марна траціць на чэргі, дзе б яны ні былі. Мы ў аддзеле загс Ушацкага райвыканкама заўсёды імкнёмся рабіць усё як мага зручней для людзей, аднак здараецца, што і не выслухаеш чалавека ў адну хвіліну, бо ўжо ёсць на прыёме людзі. Паток грамадзян у нас вялікі, толькі ў студзені гэтага года выдадзена 141 даведка, а звяртаюцца не толькі за гэтым. Менавіта таму хачу яшчэ раз нагадаць ушачанам, што ў загсе існуе папярэдні запіс на прыём і папярэдняе кансультаванне. Гэта азначае, што вы самі, ці вашы родныя могуць прыйсці ці патэлефанаваць у аддзел загса (2-17-85) і запісацца на пэўны час. Ведаючы, колькі займае, напрыклад, працэдура ўстанаўлення бацькоўства, мы папярэдзім іншых грамадзян і адразу прымем вас, падрыхтаваўшы ўсё неабходнае. Што датычыцца папярэдніх кансультацый, то іх, калі не патрабуюць дадатковага высвятлення абставін, людзі атрымліваюць адразу, як патэлефанавалі. У мінулым годзе гэтым правам скарысталася 29 грамадзян, а на прыём па папярэднім запісу прыйшоў 41 чалавек.
На падставе тэлефонных заявак было выдадзена 3 даведкі аб запісах акта грамадзянскага стану, столькі ж у студзені гэтага года. Гэта вельмі зручна для маці, якія выхоўваюць немаўля і якім няма каму дапамагчы.
Мяркую, што ведаючы пра такія формы работы, правам папярэдняга запісу сёлета скарыстаецца больш людзей.
А.МАЛАШЧАНКА, начальнік аддзела загса.