На выязны прыём у вёсцы Ляснеўшчына, які праводзіў намеснік старшыні райвыканкама М.І.Бухалка, сабралася даволі многа людзей, хоць і пражывае іх тут крыху больш дваццаці, у асноўным – дачнікі. На сустрэчу з уладай, якая праходзіла ў памяшканні магазіна, прыйшлі не толькі тыя, хто хацеў узняць канкрэтную праблему або задаць пытанне, але і жыхары, якія імкнуліся даведацца пра навіны раёна, паслухаць іншых.
Асноўная праблема, што хвалюе жыхароў названай вёскі, – стан дарог. Мікалай Іванавіч патлумачыў, што рабіць капітальны рамонт няма магчымасці, бо гэта далёка не адзіная дарога ў сельсавеце і раёне, якая патрабуе рамонту, а вось прагрэйдзіраваць і падсыпаць – іншая справа.
Паступіла скарга адной жыхаркі, што яе агарод затапіла вадой. Хутка ўжо садзіць, а іншага ўчастка ў яе няма. Адбылося гэта, магчыма, з-за таго, што забілася сцёкавая труба.
І з першым, і з другім пытаннем М.І.Бухалка пасля сустрэчы дадаткова азнаёміўся на месцы.
Папрасілі жыхары таксама высекчы кусты на скрыжаванні дарог пры ўездзе ў вёску, бо асабліва летам дрэнна праглядаецца дарога, а гэта вельмі небяспечна.
Узнімалі прысутныя і пытанне добраўпарадкавання вясковай тэрыторыі і могілак. Старшыня Сарочынскага сельсавета Л.Я.Птушка прапанавала сабрацца разам і правесці суботнік, а таксама навесці кожнаму парадак каля сваіх дамоў.
Былі і іншыя асабістыя пытанні да прадстаўнікоў улады.
Напрыканцы прыёму галоўны спецыяліст райвыканкама Р.П.Пачэпка нагадала, што 25 красавіка пройдуць выбары, расказала пра кандыдатаў, якія балаціруюцца па гэтай акрузе.
В.ПОЛАЗАВА.
