Нядаўна карэспандэнту нашай газеты давялося пабываць у турыстычнай паездцы па краінах Прыбалтыкі. І адным з уражанняў ад падарожжа стала вялікая колькасць наркаманаў, якія, не тоячыся, прагульваюцца па цэнтральных вуліцах гарадоў, а іншы раз і дапякаюць турыстаў, просяць у іх грошы на “дозу”. На шчасце, на вуліцах беларускіх гарадоў мы пакуль такога не бачым. Вось толькі не існуе чароўнай “заслоны”, якой можна было б адгарадзіцца ад пранікнення ўсяго прыкрага, чым наводнены сучасны свет, а таму праблема распаўсюджання наркаманіі набывае вастрыню і ў Беларусі: Прэзідэнт краіны лічыць яе рэальнай пагрозай для дэмаграфіі і здароўя нацыі. Відавочна, што ўвядзенне больш жорсткіх мер да наркадылераў і наркаманаў – патрабаванне часу, таму нядаўна былі прыняты адпаведныя заканадаўчыя акты. Пракаментаваць зацверджаныя імі новаўвядзенні мы папрасілі памочніка пракурора Ушацкага раёна Наталлю Фёдараўну АВАДНЁВУ.
Падпісаны 28 снежня 2014 года Прэзідэнтам краіны Дэкрэт №6 “Аб неадкладных мерах па процідзеянні незаконнаму абароту наркотыкаў”, а таксама закон “Аб унясенні дапаўненняў і змяненняў у Крымінальны кодэкс Рэспублікі Беларусь па пытаннях процідзеяння незаконнаму абароту наркатычных сродкаў, псіхатропных рэчываў, іх прэкурсораў або аналагаў”, які ўступіў у сілу 4 лютага бягучага года, прадугледжваюць як удасканаленне існуючага заканадаўства, так і шэраг новаўвядзенняў, не маючых аналагаў у нормах міжнароднага антынаркатычнага права. Так, уводзіцца паняцце “базавая структура наркатычных сродкаў, псіхатропных рэчываў, іх прэкурсораў і аналагаў”, якое аўтаматычна ставіць пад забарону абарот практычна ўсіх новых псіхаактыўных рэчываў, што з’яўляюцца на наркарынку, у тым ліку “спайсаў” і “курыльных сумесяў”.
Да 20 гадоў павялічваецца тэрмін пазбаўлення волі за збыт усіх пералічаных вышэй сродкаў і да 25 гадоў – калі гэта прывяло да смерці ў выніку іх ужывання. Адначасна да 14 гадоў зніжаны ўзрост прыцягнення да крымінальнай адказнасці за здзяйсненне названых дзеянняў. Прадугледжана таксама адказнасць за перамяшчэнне псіхаактыўных рэчываў праз дзяржаўную мяжу Беларусі ў рамках Мытнага саюза, што дазволіць больш эфектыўна змагацца з кантрабандай з тэрыторый ўваходзячых у яго склад краін. Да крымінальнай адказнасці цяпер будуць прыцягвацца асобы, якія дазволілі ў сваіх дамах і кватэрах вырабляць наркотыкі і псіхатропы.
Не застануцца без пакарання і спажыўцы названых сродкаў. За з’яўленне ў грамадскім месцы ў стане, які выкліканы спажываннем без назначэння ўрача псіхаактыўных рэчываў, яны атрымаюць штраф ад 5 да 10 базавых велічынь, за ўжыванне забароненых сродкаў у такім месцы – ад 10 да 15. Калі ж названыя дзеянні будуць паўтораны на працягу года, правапарушальнік атрымае штраф, арышт на тэрмін да 3х месяцаў або пазбаўленне волі да двух гадоў.
Арганізатары культурназабаўляльных мерапрыемстваў павінны прымаць меры, каб не дапускаць на іх асоб, што знаходзяцца пад уздзеяннем наркотыкаў і псіхатропаў. На ўладальнікаў інтэрнэтрэсурсаў ускладаецца абавязак аналізаваць іх змест (у тым ліку форумаў, блогаў і г.д.), каб гэтая інфармацыйная крыніца не выкарыстоўвалася для распаўсюджання паведамленняў, накіраваных на незаконны абарот наркотыкаў. У банкаўскай сферы ўведзена абавязковая ідэнтыфікацыя фізічных уладальнікаў электронных кашалькоў.
Няма сумненняў, што ўвесь гэты комплекс прававых мер істотна паўплывае на небяспечную тэндэнцыю распаўсюджання псіхаактыўных рэчываў у нашай краіне.
