З 2005 года на Ушаччыне ажыццяўляе сваю дзейнасць прыватнае вытворчае ўнітарнае прадпрыемства “Меналайн”, заснавальнікам якога з’яўляецца Віктар Анатольевіч Прашкевіч. І калі за гэты час многія фірмы як рэгістраваліся, так і спынялі сваю дзейнасць, то “Меналайн” не толькі ўтрымаўся, але і пашыраў род занятку. І хоць сёння гэта не буйное прадпрыемства, але яно трывала заняло сваю нішу, займаючыся зносам старых дамоў.
Дома і сцены дапамагаюць
Для любой справы, безумоўна, заўсёды неабходны стартавы капітал. А таму і пачынаў В.А.Прашкевіч з малога, пакрыху зарабляючы на далейшае развіццё. Прыбытак не “пускаўся на вецер”, а ўкладваўся ў тое, што давала аддачу – так паступова абжываліся тэхнікай, неабходным абсталяваннем. Невялікі адрэзак часу прадпрыемства базіравалася ў Матырыне, але высокая арэндная плата вымусіла адмовіцца ад памяшкання. Знайшоўся больш зручны і добры варыянт – у Федаронках, дзе размяшчаецца бацькоўская сядзіба.
Разбірацца ж у многіх сферах дапамагала і вышэйшая адукацыя, Віктар Анатольевіч скончыў Полацкі дзяржаўны ўніверсітэт па спецыяльнасці інжынербудаўнік. Не рваўся малады хлопец у вялікі горад, а вырашыў распачынаць сваю справу ў родным раёне – дома, як кажуць, і сцены дапамагаюць. Тым больш што з дзяцінства бацькі прывучылі шмат працаваць, заўсёды дабівацца намечанага.
Добраўпарадкоўваюць вёскі
Асноўным відам работ прыватнага прадпрыемства з пачатку яго заснавання па сённяшні дзень з’яўляецца знос старых і трухлявых дамоў. Сельскае насельніцтва старэе, у многіх населеных пунктах нямала пустуючых пабудоў. Ёсць вёскі, дзе на адзін дагледжаны дом прыходзіцца тры трухлявыя. А таму справа гэтая патрэбная і запатрабаваная, хоць і нялёгкая. Атрымліваецца, што “Меналайн” не проста аказвае паслугі, а робіць населеныя пункты добраўпарадкаванымі.
– З прыняццем Указа №100 “Аб мерах па ўдасканаленні ўліку і скарачэнні пустуючых і трухлявых дамоў у сельскай мясцовасці” актывізавалася работа па іх зносе, да нас звяртаюцца старшыні сельскіх Саветаў дэпутатаў. Немалую работу, напрыклад, зрабілі па сваім Сарочынскім сельсавеце, толькі ў Вярхоўі знеслі каля дзясятка дамоў, – расказвае В.Прашкевіч.
Дарэчы, працуе “Меналайн” не толькі ў нашым раёне, даводзілася зносіць дамы і на суседняй Полаччыне.
Дадатковай работай прадпрыемства з’яўляецца лесанарыхтоўка і апрацоўка драўніны, на базе для гэтых мэт маецца невялікая піларама. Не з размахам, але займаецца вытворчае прадпрыемства і сельскай гаспадаркай – сее на прылягаючых землях зерневыя.
“Бацька – мой першы памочнік!”
Здавалася б, дзейнасць, якой займаецца “Меналайн”, патрабуе шмат рабочай сілы, аднак тут усяго некалькі працаўнікоў. Калісьці работнікаў было больш, але цяперашняя эканамічная сітуацыя вымушае трымаць невялікі штат.
– Няма калі размаўляць, трэба ісці працаваць! – рваліся хутчэй узяцца з раніцы за справу асноўныя работнікі вытворчага прадпрыемства – Віталь Богуш і Віталь Роўба. У гэты дзень у іх на мэце стаяла закончыць рамонт аднаго з трактароў.
– Абодва – людзі старанныя, за што ні возьмуцца – усё выканаюць як след, – пачаў хваліць сваіх работнікаў Віктар Анатольевіч.
В.Богуш па спецыяльнасці вальшчык лесу, а В.Роўба трактарыст-машыніст з залатымі рукамі. Не толькі ў тэхніцы, а і ў сельскай гаспадарцы разбіраецца выдатна!
А вось сваёй правай рукой, першым памочнікам і дарадцам Віктар называе свайго бацьку Анатоля Іосіфавіча. Сплаў маладосці, мудрасці і вопыту, вядома ж, дае добры вынік.
Трэба адзначыць, што Віктар Анатольевіч з тых, хто сам разам з работнікамі бярэцца за справу. Не толькі кіруе і арганізоўвае работу, а і выконвае яе па неабходнасці.
І робяць дабрачынныя справы
Спытаўшы ў В.Прашкевіча пра дабрачынныя справы іх прадпрыемства, прывяла яго ў разгубленасць: “Нічога звышнатуральнага не робім!” Тым не менш, не раз даводзілася чуць толькі добрыя водгукі пра заснавальніка ПВУП “Меналайн”. Так, нядаўна мы пісалі пра новы масток, які з’явіўся ў Двор Пліне. Пакласці яго на топкім месцы бясплатна дапамог менавіта Віктар Анатольевіч. Падтрымлівае арганізацыя раённае аддзяленне Фонду міру, прымала ўдзел і ў зборы грашовых сродкаў на лячэнне анкалагічна хворых дзяцей.
Чаму ўсё ж такі “Меналайн”?
Стваральнікі прыватных прадпрыемстваў звычайна імкнуцца ўкласці ў назву сэнс сваёй дзейнасці ці, напрыклад, штосьці звязанае са сваім імем, прозвішчам. Як патлумачыў Віктар Анатольевіч, ідэя назвы ўзнікла ад мясцовага возера Мена. Першапачаткова пры ўтварэнні прадпрыемства ў планах была здабыча сапрапелі – надзвычай карыснага ўгнаення з гэтага возера, але ажыццявіць такую задуму не атрымалася. Гаворачы ж аб планах на будучае, мужчына называе не толькі пашырэнне таго, чым ужо займаюцца, а і новыя віды дзейнасці. У ліку іх зноў жа здабыча сапрапелі. Ну а дзякуючы энтузіязму, мэтанакіраванасці і працавітасці заснавальніка ўсё павінна атрымацца!
Вольга КАМАРКОВА.
На здымку: Віктар і Анатоль Прашкевічы; Віталь Богуш і Віталь Роўба.
