На мінулым тыдні ва Ушачах прайшоў прававы прафсаюзны прыём грамадзян. На пытанні ушачан, звязаныя з абаронай працоўных і сацыяльна-эканамічных інтарэсаў, адказалі галоўны прававы інспектар працы Віцебскай абласной арганізацыі Беларускага прафсаюза работнікаў дзяржаўных і іншых устаноў Галіна Зубрыцкая і пракурор Ушацкага раёна Максім Падворны. Прывядзём адказы на некаторыя з іх.
– Спазніўся на работу на 20 хвілін. На наступны дзень на два тыдні пайшоў у водпуск, а калі вярнуўся, мяне адразу ж азнаёмілі з загадам аб прыцягненні да адказнасці. Такія дзеянні правамерныя? Можна ў перыяд водпуску выдаваць такі загад?
– Наймальнік зрабіў правільна, арыентуючыся на парадак і тэрміны, прадугледжаныя арт. 199 і 200 Працоўнага кодэкса. Загад аб дысцыплінарным спагнанні з указаннем матываў аб’яўляецца работніку пад роспіс у пяцідзённы тэрмін з дня яго здзяйснення, не лічачы часу хваробы работніка, яго знаходжання ў водпуску ці на ваенных або спецыяльных зборах.
– Ці можа наймальнік устанавіць папярэдняе выпрабаванне, калі з маёй згоды мяне пераводзяць на іншую пасаду?
– Пры пераводзе работніка выпрабаванне не ўстанаўліваецца.
– Ці можна адклікаць работніка з працоўнага водпуску ўсяго на адзін дзень?
– Можна, гэта прапісана ў арт.174 Працоўнага кодэкса, толькі патрэбна згода самаго работніка. Нявыкарыстаная частка водпуску па дамоўленасці з наймальнікам можа быць дадзена на працягу рабочага года, далучана да водпуску за наступны перыяд ці кампенсавана ў грашовай форме. Нельга адклікаць з водпуску асоб маладзей 18 гадоў, а таксама тых, хто мае права на дадатковы адпачынак за работу ў шкодных ці небяспечных умовах працы і за яе асаблівы характар.
– Ці вызначана заканадаўствам максімальная колькасць выхадных для прыцягнення да работы?
– Так – не больш 12 выхадных у год для кожнага работніка. Аднак ёсць выключэнні, прапісаныя ў артыкуле 143 Працоўнага кодэкса. Напрыклад, у выпадку вытворчай аварыі, выканання работ, неабходных для тэрміновай ліквідацыі наступстваў стыхіі, для прадухілення катастрофы ці няшчасных выпадкаў.
Падрыхтавала
Вольга КАМАРКОВА.
