У рэдакцыю звярнуўся адзін з нашых чытачоў, які пацікавіўся: “На якіх вадаёмах нашага раёна можна лавіць рыбу аматарскім спосабам бясплатна, а дзе арганізована аматарскае платнае рыбалоўства?”. Гэтае пытанне мы адрасавалі галоўнаму спецыялісту ўпраўлення сельскай гаспадаркі і харчавання Ушацкага райвыканкама Таццяне Уладзіміраўне ЖОЛАБАВАЙ:
– На сённяшні дзень у арэндзе па дагаворах знаходзіцца шэраг вадаёмаў раёна, від рыбалоўства і памер платы за яго ўстанаўлівае арандатар. Ушацкі лясгас арандуе возера Усвея ў мэтах толькі прамысловага рыбалоўства. У склад рыбаводчай гаспадаркі Ушацкай раённай арганізацыйнай структуры Беларускага таварыства паляўнічых і рыбаловаў уваходзяць сажалкі ў Жарах, Старым Сяле і Вацлавове. Арандатарам, якія займаюцца прамысловым відам рыбалоўства, дазваляецца лоўля з выкарыстаннем сетак, невада і іншых прылад. І прамысловае, і платнае аматарскае рыбалоўства можна ажыццяўляць на возеры Звонь, якое арандуе аднайменнае таварыства з абмежаванай адказнасцю, азёрах Матырына і Салонец, перададзеных у арэнду ПТУП “ТэхнаКрас”, возеры Оталава (уладальнік – ТАА “ФішплюсТур”). Толькі платнае аматарскае рыбалоўства арганізавана на азёрах ТАА “Янтарны бераг” – гэта Полазна, Тартак і Царкавішча, а таксама на возеры Лагаўское (ТАА “МаэстраТур”). Трэба адзначыць, што ў дагаворах арэнды некаторых прыватных прадпрыемстваў прапісаны пункт, згодна якому жыхары вёсак, якія ўваходзяць у прыбярэжную паласу арандаваных азёр, ад платы за рыбалку вызваляюцца. На ўсіх астатніх, не названых вышэй вадаёмах раёна ва ўстаноўленыя прыродаахоўным заканадаўствам тэрміны лавіць рыбу можна бясплатна.
