Вядома, што трывалая кармавая база – мэта і неабходнасць сельскагаспадарчых арганізацый. Колькасць і якасць – паказчыкі, якія ўплываюць на эфектыўнасць жывёлагадоўлі, ад гэтага напрамую залежыць не толькі паспяховая зімоўка жывёлы, а і прыбаўкі мяса-малочнай прадукцыі. І калі з колькасцю справы абстаяць лепш – некаторыя сельгаспрадпрыемствы часам нават маюць магчымасць прадаваць лішкі сваіх кармоў, то ў плане якасці яшчэ існуюць слабыя месцы.
Спецыялісты райветстанцыі кантралююць якасць кармоў і ў працэсе закладкі, і пры закрыцці. Пасля лабараторных аналізаў можна прааналізаваць яго на ўтрыманне караціну і вільготнасць. Так, вільготнасць практычна ўсіх сянажных траншэй ў гаспадарках была ў межах аптымальных 45-55 працэнтаў, што адпавядае 1-3 класу, за выключэннем “Агра-Селішча”, “Глыбачан” і “Райаграсэрвіса”, дзе па адной траншэі не адпавядалі гэтым нормам.
У іншых выпадках праблем з вільготнасцю не ўзнікала, бо практычна ўвесь час корманарыхтоўкі стаяла сухое надвор’е і трава паспявала як след правяліцца. Толькі ў пачатку касавіцы з-за павышанай вільготнасці зялёнкі ў “Глыбачанах” і “Райаграсэрвісе” заклалі па дзве сіласныя траншэі. У “Глыбачанах” як па караціне, так і па вільготнасці закладзены сілас атрымаўся вышэйшага класу, у “Райаграсэрвісе” – вышэйшым па вільготнасці і першым класам па караціне.
Высокім утрыманнем караціну ў закладзеных кармах могуць пахваліцца “Вялікадолецкае” і “Ільюшынскі”, дзе 8 з 10 сянажных траншэй першакласныя. Да першага класу па гэтым паказчыку адносіцца корм з утрыманнем караціну ў адным кілаграме 60 мг і вышэй. У названых гаспадарках было больш 78 мг/кг у Міхалкаўшчыне і Царкавішчы, больш 75 – на ільюшынскім комплексе, у той час як у іншых гаспадарках гэты паказчык заставаўся ў межах 60.
У якасці альтэрнатывы традыцыйнай закладкі сенажу ў траншэі “Райаграсэрвіс”, “Кублічы” і “Арэхаўна” некаторую колькасць кармоў нарыхтавалі па новай тэхналогіі ў палімерную стрэйч-плёнку. Пры выкананні тэхналогіі гэта дазваляе павялічыць пажыўнасць кармоў прыкладна на 20 працэнтаў. Дадзены метад не толькі захоўвае якасць, але і павялічвае выхад кармавых адзінак з гектара. Пры закладцы траў звычайным спосабам іх харчовая каштоўнасць складае 0,28 кармавых адзінак, а ў рулонах пад стрэйч-плёнкай можна атрымаць 0,4-0,5. Акрамя гэтага, плюсы і ў тым, што рулоны могуць захоўвацца і пад адкрытым небам, нарыхтоўку можна праводзіць і ў няўстойлівае надвор’е – сянаж з вільготнасцю да 55 працэнтаў выдатна захоўваецца, не губляючы сваёй якасці. І зусім немалаважна, што такі спосаб не даражэй за драдыцыйны. Праверка якасці такога сенажу ў названых трох гаспадарках паказала, што корм як па ўтрыманні караціну, так і вільготнасці адпавядае першаму класу.
Чаго ж не хапае нашым кармам для вялікіх прыбавак у жывёлагадоўлі? Па словах начальніка райветстанцыі В.Л.Зеленіка, галоўнай праблемай кармоў у папярэднія гады быў недахоп бялку. Для таго, каб гэты важнейшы кампанент утрымліваўся ў кармах, неабходна сеяць пашавыя травяныя сумесі, люцэрну, канюшыну. Калі пасля ацёлу жывёлы ў перыяд раздою адкрыць багатую на бялок траншэю канюшыны, то не патрэбна будзе вялікай колькасці канцэнтраваных кармоў, адпаведна і вялікіх затрат на іх набыццё, якія ледзьве не ўдвая павышаюць кошт літра малака. Ды і бялок, які ёсць у травах, дае намнога большую аддачу чым той, які ўтрымліваецца ў камбікорме.
Немалаважны факт, які таксама можа паўплываць на якасць кармоў – дрэннае ўкрыццё траншэі. У гаспадарках раёна выкарыстоўваюць пры гэтым звычайную плёнку, толькі ў ААТ “Дземенец” прыслухаліся да парад спецыялістаў і набылі спецыяльную палімерную, прызначаную для сянажных і сіласных траншэй. Яна не толькі дапамагае захаваць якасць корму, а і паслужыць не адзін сезон.
На гэтым тыдні яшчэ закладвалі сянажныя траншэі некаторыя гаспадаркі раёна. Як выконвае тэхналогію закладкі “Райаграсэрвіс”, мы праверылі разам са спецыялістам райветстанцыі В.Ф.Міцкевіч на сянажнай траншэі ў Матырыне (на здымку). Тэмпература і вільготнасць аказаліся ў межах нормы.
Сельгаспрадпрыемствамі раёна ўжо нарыхтавана больш за 30000 тон кармоў, што складае 12,6 кармавых адзінак на ўмоўную галаву жывёлы.
Вольга КАМАРКОВА.
