Шэсць маладых людзей за апошні час абралі для сябе прафесію выратавальніка і прыйшлі служыць у раённы аддзел па надзвычайных сітуацыях.
З красавіка асвойвае справу ў пажарнай аварыйнавыратавальнай часці №1 г.п.Ушачы старшы пажарны Яўген Ціханаў. Ужо больш за паўгода прымае трывожныя званкі на цэнтральным пульце кіравання дыспетчар Арцём Бірукоў, асвоіўся ў гэтай жа часці вадзіцель Аляксей Харэвіч. Зусім нядаўна маладымі кадрамі папоўніўся і пажарны аварыйнавыратавальны пост №12 аграгарадка Глыбачка – вадзіцелямі прыйшлі працаваць сюды Максім Кляшторны і Андрэй Бараніч. У аддзеле не баяцца давяраць маладым адказныя ўчасткі – камандзірам аддзялення пажарнага аварыйнавыратавальнага паста №11 аграгарадка Вялікія Дольцы назначаны Сяргей Собаль.
Маладыя людзі ўжо вылучыліся сваёй адказнасцю і працавітасцю, нягледзячы на яшчэ зусім невялікі вопыт у надзвычайных сітуацыях дзейнічаюць смела і рашуча, ахвотна вучацца ў сваіх старэйшых калег.
Маладая змена па традыцыі прымае прысягу, толькі для сёлетніх “навабранцаў” яна прайшла не ў такім фармаце, як звычайна. Учора маладыя пажарныя Ушаччыны разам з такімі ж калегамі з усёй вобласці на плошчы Перамогі ў Віцебску ва ўрачыстай абстаноўцы прынялі прысягу.
Гэты фотаздымак удалося зрабіць якраз напярэдадні ад’езду хлопцаў у абласны цэнтр.
– Хвалюемся, але не больш, чым пры выездзе на пажар! – адзначылі пажарныя.
Што ж, хочацца пажадаць маладой змене лёгкай службы і сухіх рукавоў!
Вольга КАМАРКОВА.
На здымку: С.Собаль, М.Кляшторны, А.Бараніч, Я.Ціханаў, А.Харэвіч.