З пастаянным клопатам –
у часовы прытулак
Шчаслівымі ўсмешкамі поўніўся ў мінулую сераду дзіцячы сацыяльны прытулак гарпасёлка. У Міжнародны дзень абароны дзяцей у госці да маленькіх выхаванцаў установы завітала нямала гасцей – прадстаўнікоў розных служб Ушаччыны і проста неабыякавых грамадзян. Прычым усе – не з пустымі рукамі.
– Ты толькі паслухай, мая лялька плакаць умее, – паказваючы сваёй дваюраднай сястрычцы Ульяне толькі што атрыманы падарунак, з непадробным клопатам гаварыла чатырохгадовая Ліза. – Зараз я яе абдыму, пагушкаю – і яна супакоіцца. Так некалі рабіла са мной мама…
Здавалася, гэтая маленькая дзяўчынка разумее ў жыцці больш, чым многія дарослыя. Ва ўсялякім выпадку яна дакладна ведае, наколькі важна быць патрэбным і любімым. Гэтага і жадалі Лізе і Ульяне, якія на некаторы час засталіся без апекі бацькоў, наведвальнікі прытулка. Сярод іх – начальнік фінансавага аддзела райвыканкама Наталля Рыгораўна Дубоўская, начальнік аддзела адукацыі, спорту і турызму Іна Фёдараўна Сыроўчанка, якія прывезлі дзяўчынкам падарункі ад раённай улады і арганізацыі РГА “Белая Русь”.
Наведваць у першы дзень лета выхаванцаў дзіцячага сацыяльнага прытулка стала добрай традыцыяй і для супрацоўнікаў райаддзела па надзвычайных сітуацыях. Вось і сёлета, на некаторы час адклаўшы ўбок службовыя справы, яны падарылі малышкам цацкі і ласункі. Аказалі дапамогу гэтай дзіцячай установе агароднінасушыльны завод, прадпрыемствы “Лес”, “Прамкамбінат”, “Твестуба”, індывідуальны прадпрымальнік В.А.Шчарбакоў.
… і дом, дзе саграваюцца сэрцы
Святочная атмасфера панавала ў мінулую сераду ў сям’і Анастасіі і Вячаслава Залатых з аграгарадка Арэхаўна. На момант нашага візіту ў дом сямейнага тыпу ўсе яго жыхары былі на месцы: тата прыглядваў за дзецьмі, якіх тут ніколі не дзялілі на сваіх і прыёмных, а мама гатавала на кухні смачныя сырнікі – іх прыцягальны пах у хуткім часе сабраў вялікую сям’ю за агульным сталом. Дадалі прыемнага настрою дзецям і атрыманыя ў гэты дзень ад кіраўніцтва раёна і “Белай Русі” каштоўныя падарункі.
Шчыра верыцца ў тое, што такая цеплыня сямейнага ачага будзе саграваць усіх юных ушачан.
Кацярына КАВАЛЕЎСКАЯ.
