Прафілактычная акцыя Міністэрства па надзвычайных сітуацыях стартавала ў краіне з 22 жніўня, і прымеркавана яна да Дня ведаў. Галоўная ж мэта прафілактычнага мерапрыемства – прыцягненне ўвагі да праблемы траўматызму і гібелі дзяцей на пажарах. Часта бацькі пакідаюць іх без нагляду, і такая бяспечнасць нярэдка прыводзіць да трагедыі. У мінулым годзе на пажарах у краіне загінула 8 дзяцей, сёлета агонь забраў жыцці шасці дзетак.
Акцыя пройдзе ў тры этапы – на аб’ектах гандлю, у агульнаадукацыйных і дашкольных установах. На Ушаччыне першы этап будзе праходзіць з 22 па 31 жніўня ва ўнівермагу, дзе дзяцей і бацькоў чакаюць навучальныя конкурсы, гульні, віктарыны і іншыя сюрпрызы ад выратавальнікаў.
Рэйды па гаспадарках
Уборачная кампанія ў самым разгары. Супрацоўнікі раённага аддзела па надзвычайных сітуацыях правялі абследаванні зернесушыльных комплексаў, зернесховішчаў, камбайнаў і сельскагаспадарчай тэхнікі, што задзейнічана на жніве. Трэба сказаць, што ў ходзе праверкі было выяўлена нямала парушэнняў правіл пажарнай бяспекі. Але ва ўсіх выпадках аграрыі адразу імкнуліся іх выправіць. Праведзеныя рэйды сталі стымулам для работнікаў гаспадарак па прывядзенні аб’ектаў і тэхнікі ў стан, пры якім рызыка ўзнікнення надзвычайнай сітуацыі зводзіцца да мінімуму. З працаўнікамі таксама праведзены інструктаж па выкананні мер пажарнай бяспекі, праверылі выратавальнікі і навыкі карыстання пярвічнымі сродкамі пажаратушэння, і дзеянні ў выпадку ўзнікнення пажару.
В.КАРЭЙША, інспектар інспекцыі нагляду і прафілактыкі Ушацкага РАНС.