Акция «Наши дети» на Ушаччине

Наши дети

Складальнікамі сапраўднага свята з’яўляюцца шчырасць, душэўнасць, весялосць і, вядома ж, розныя сюрпрызы. Рэспубліканская акцыя “Нашы дзеці” на іх шчодрая. Кожны дзень дабрачыннага навагодняга марафону не абыходзіцца без урачыстасцей для хлопчыкаў і дзяўчынак. Актыўна праводзяцца яны і на Ушаччыне.

Для лепшых школьнікаў Прыдзвіння

Каля тысячы хлопчыкаў і дзяўчынак з усіх куточкаў Прыдзвіння сабраліся ў паўночнай сталіцы на абласную навагоднюю ёлку. Сярод удзельнікаў свята былі і 25 юных прадстаўнікоў нашага раёна.

Выдатнікаў вучобы, пераможцаў алімпіяд, творчых конкурсаў і спартыўных спаборніцтваў, выхаванцаў кадэцкага вучылішча, школ-інтэрнатаў, дзяцей з мнагадзетных сямей сустрэлі ў абласным цэнтры яшчэ напярэдадні. Школьнікаў чакала насычаная культурна-забаўляльная праграма, а ў пятніцу іх сабрала вакол сябе галоўная ёлка рэгіёну, якая праходзіла 28 снежня ў канцэртнай зале “Віцебск”. Са словамі віншавання перад прысутнымі выступіў старшыня аблвыканкама Мікалай Мікалаевіч Шарснёў.

– Дзяржава робіць усё магчымае для паспяховай вучобы, гарманічнага развіцця, умацавання здароўя падрастаючага пакалення, – падкрэсліў ён. – Рэалізуюцца дзяржаўныя праграмы “Дзеці Беларусі”, “Маладыя таленты Беларусі”, удасканальваецца матэрыяльна-тэхнічная база навучальных устаноў. І ў надыходзячым годзе ў ліку прыярытэтаў сацыяльна-эканамічнага развіцця Віцебшчыны па-ранейшаму будзе падтрымка дзяцінства і юнацтва.

Крэатыўныя дарожнікі

У прадчуванні асаблівай падзеі жылі гэтымі днямі работнікі ДРБУ-105. Упершыню, каб павіншаваць сваіх дзетак з навагоднімі святамі, яны не сталі запрашаць культработнікаў, а самі правялі ранішнік.
Ідэйным натхняльнікам і каардынатарам творчага працэсу выступіла прафсаюзны лідар Аляксандра Коцур. Падрыхтаваны ёй сцэнарый “мадэрнізаванай” пад Новы год казкі “Калабок” прыйшоўся да спадобы ўсім членам калектыву. Хутка размеркавалі ролі і прыступілі да рэпетыцый – мінімум двойчы на тыдні.

– Дастаткова няпростым было адшукаць касцюмы, – расказвае А.Коцур. – Уборы для Дзядулі Мароза і Снягуркі пазычылі ў адной з ушацкіх арганізацый, астатняе рабілі самі: хтосьці прынёс прыгожае футра для нашай лісічкі, нехта – стракатую спадніцу для Бабы-Ягі, у кагосьці знайшлася маска ваўка… Давялося павазіцца і з касцюмам Калабка – яго рабілі з кардону і іншых падручных матэрыялаў, прадумвалі мацаванне. Аднак такі працэс быў у радасць.

А сярод актывістаў можна назваць Анатоля Коцура, Андрэя Агіевіча, Сяргея Ладзіка, Дзяніса Салодкіна, Аляксея Александровіча, Вольгу Урбан, Алену Арцем’еву, Таццяну і Дзмітрыя Цімафеевых, Святлану Парашкіну, Наталлю Круцёнак, сама ж Аляксандра Коцур узяла на сябе непрывабную, але вясёлую ролю Бабы-Ягі.
У адзначаны дзень ля прыгожай ёлкі ў будынку ДРБУ-105 было ажыўлена. Казачныя героі вадзілі карагоды, запрашалі хлопчыкаў і дзяўчынак у гульні і, канечне, ніхто не застаўся без падарункаў ад прафсаюзнай пярвічкі.

Зрэшты, і пасля заканчэння ранішніка сюрпрызы для дзяцей не завяршыліся. У суседнім пакоі іх чакаў салодкі стол, цэнтральнае месца на якім занялі вялізныя тарты з навагоднімі “малюнкамі”. Прыгатавала іх Н.Круцёнак, для якой кулінарыя з нядаўняга часу стала любімым заняткам. Кожны яе торцік – сапраўдны шэдэўр. Вось і дзеці ўшацкіх дарожнікаў, убачыўшы на стале прыгожыя салодкасці, доўга не маглі рашыцца на тое, каб іх есці. І толькі сыночкі Наталлі Паша і Мікіта смела цягнулі да іх ручкі.
Вось так па-сямейнаму цёпла і шчыра прайшоў навагодні ранішнік у ДРБУ-105. Зрэшты, на гэтым прафсаюзная пярвічка спыняцца не збіраецца і ўжо плануе шэраг новых цікавых мерапрыемстваў.

І прэзент атрымалі, і брандспойт патрымалі
Не зусім звычайны навагодні ранішнік прайшоў нядаўна ў ТЦСАН Ушацкага раёна. У рамках адразу дзвюх рэспубліканскіх акцый – “Нашы дзеці” і “Бяспечны Новы год” – у аддзяленне сацыяльнай адаптацыі і рэабілітацыі, што ў Градзянцы, былі запрошаны хлопчыкі і дзяўчынкі з абмежаванымі магчымасцямі. Віншаванні ў гэты дзень гучалі не толькі ад Дзеда Мароза і Снягурачкі, іншых казачных персанажаў, але і ад… супрацоўнікаў МНС.
Дзякуючы арыгінальнаму сцэнарыю, творчаму выступленню работнікаў сацыяльнай службы, выратавальнікаў, актывістаў райкама БРСМ, мерапрыемства прыйшлося даспадобы не толькі дзецям, але і іх бацькам, шматлікім гасцям. Хлопчыкі і дзяўчынкі з задавальненнем расказвалі Дзядулю Марозу вершы, дружна вадзілі карагоды, дэманстравалі свае веды па правілах бяспечнага карыстання гірляндамі, феерверкамі. Не менш захапляльнае дзейства чакала дзяцей на вуліцы, дзе можна было пасядзець у пажарнай машыне, праверыць у дзеянні сапраўдны брандспойт.

Не абышлося, вядома, і без падарункаў. Мяккія цацкі ў выглядзе мілых парсючкоў дзецям-інвалідам уручылі супрацоўнікі РАНС. Лясгас паклапаціўся пра дастаўку ў аддзяленне прыгажуні-ёлкі. Сувеніры, пачастункі і грашовыя сродкі на іх набыццё выдзелілі ААТ і ТАА “Усход-Нур”.

Дзякуючы ўсім ім хлопчыкі і дзяўчынкі з абмежаванымі магчымасцямі правялі гэты дзень ярка і запамінальна, адчулі цеплыню сэрцаў неабыякавых людзей.

Не шкадавалі касцюмаў, далоняў і ног

Звонкім дзіцячым гоманам поўніліся ў апошнія дні адыходзячага года сцены раённага цэнтра культуры і народнай творчасці. На дабрачынныя навагоднія ранішнікі былі запрошаны 173 хлопчыкі і дзяўчынкі з усіх куточкаў Ушаччыны. Гэта маленькія сіроты, выдатнікі вучобы, актывісты грамадскага жыцця. Для ўсіх іх у фае ўстановы культуры спецыялісты раённага цэнтра дзяцей і моладзі падрыхтавалі насычаную забаўляльную праграму. Самы маленькі яе ўдзельнік – чатырохгадовы Максім Манух – прыехаў на ўрачыстасць разам з бабуляй са Старога Сяла. Пераўвасобіўшыся ў медзведзяня, хлопчык замілаваў усіх прысутных. Сапраўдным зорным часам ранішнік стаў і для шасцігадовай ушачанкі Паліны Волах – яе энергічныя танцы ля ёлкі міжволі прымушалі хаця б топнуць нагой.

– Добра, што апранула ўнучцы зручны касцюм, а не бальную сукенку, бо на ёй не засталося б жывога месца, – усміхнулася бабуля Святлана Анатольеўна. – У дзіцячым садку ў Паліны амаль прыкладныя паводзіны, а дома і тут – сапраўдная гарэза!

Не менш яркіх эмоцый у дзяцей і дарослых выклікала другая частка святочнай праграмы – навагодняе прадстаўленне “Зімовая вандроўка да лясной елачкі”. Пазнаць у героях казкі ўшацкіх культработнікаў было амаль немагчыма: так удала яны ўвайшлі ў свае ролі, настолькі дасканалымі былі касцюмы і грым.

Шмат цёплых слоў у адрас юных ушачан прагучала ў гэтыя перадсвяточныя дні. Прывітала і павіншавала дзяцей падчас ранішнікаў старшыня раённага Савета дэпутатаў Наталля Мікалаеўна Марковіч, якая пажадала, каб новы год для ўсіх быў запамінальным і абавязкова шчаслівым.

Падрыхтавала Кацярына КАВАЛЕЎСКАЯ.



Добавить комментарий

Ваш e-mail не будет опубликован. Обязательные поля помечены *