Завяршыўся абласны этап рэспубліканскай алімпіяды па вучэбных прадметах, на якім нашы юныя землякі традыцыйна паказалі трывалыя веды. Чарговая ўзнагарода з’явіліся ў скарбонцы дасягненняў дзесяцікласніцы Ушацкай школы Златы Клачок – па выніках інтэлектуальных спаборніцтваў па беларускай мове і літаратуры яна ўзнагароджана дыпломам ІІ ступені і стала трэцяй у агульным рэйтынгу. Нагадаем: гэта ўжо не першае выступленне дзяўчыны на трэцім этапе алімпіяды – летась у яе таксама было “срэбра”, але крыху ніжэйшы рэйтынгавы паказчык, які не дазволіў прыняць удзел у фінале. Цяпер жа падрыхтоўка да апошняга ў мэтанакіраванай вучаніцы і яе настаўніцы Ірыны Уладзіміраўны Леснічэнкі ідзе поўным ходам. “Вядома ж, разлічваю на атрыманне “золата” – нездарма ж маё імя – Злата”, – з жартам і ўсур’ёз зазначае дзяўчына.
Нягледзячы на адсутнасць дыпломаў, на даволі высокім узроўні былі выступленні і іншых школьнікаў Ушаччыны. Тым больш што на абласным этапе рэспубліканскай алімпіяды ўсе яны прымалі ўдзел упершыню. “Убачылі, навучыліся – і ў наступны раз абавязкова ўсіх “парвём”!” – рашуча агучыла планы на перспектыву вучаніца 10 класа Глыбачанскай школы Дзіяна Герцык, якая сёлета таксама дэманстравала веды па беларускай мове і літаратуры.
Кацярына КАВАЛЕЎСКАЯ.
