У летні перыяд традыйцына ўзрастае колькасць надзвычайных сітуацый з удзелам непаўналетніх. Так, у Бярэзінскім раёне дзеці вырашылі самастойна запусціць газонакасілку, у выніку 6-гадовы хлопчык трапіў у бальніцу. Шпіталізацыяй скончылася прагулка па недабудаваным будынку для дзвюх дзяўчынак у Мінскім раёне – яны выпалі з акна. У Лельчыцкім раёне ў агні ледзь не загінулі двое дзетак, якія засталіся дома адны. Таму ўсе тры летнія месяцы ў рамках штогадовай прафілактычнай акцыі “Канікулы без дыму і агню” выратавальнікі вядуць работу па папярэджанні надзвычайных сітуацый.
Нагадваць пра бяспеку будуць не толькі дзецям, а і старэйшаму пакаленню: паралельна ў чэрвені-ліпені пройдзе рэспубліканская акцыя “З клопатам пра бяспеку малой радзімы”. Зрэшты, у яе рамках райаадзел па надзвычайных сітуацыях запрашае жыхароў раёна паўдзельнічаць у конкурсе “Ландшафтны дызайн МНС”. Для гэтага ўладальнікам прыватных падворкаў прапануецца аформіць клумбу, зрабіць малыя архітэктурныя формы, дэкаратыўны элемент, падзелкі ці цэлыя кампазіцыі ў стылі МНС. Старанні ўшачан у гэтым накірунку, канечне, будуць адзначаны падарункамі.
Падчас абодвух рэспубліканскіх акцый знойдзецца месца як святам з забавамі, так і вывучэнню важных асноў бяспекі, прычым, у максімальна цікавай і даступнай форме.
Вольга КАМАРКОВА.
Факт:
- каля 50 працэнтаў пажараў з-за дзіцячага свавольства з агнём прыходзіцца менавіта на чэрвень-жнівень.