На мінулым тыдні падчас пажару ў Бароўцы Лепельскага раёна абарвалася жыццё 30-гадовага мужчыны, а ў Лёзна – 47-гадовага жыхара гарпасёлка. Прычынай трагедый у абодвух выпадках стала непатушаная цыгарэта ў спалучэнні з алкаголем.
Аб тым, што курэнне – згубная звычка, не стамляюцца нагадваць выратавальнікі. МНС праводзіць новую інфармацыйна-прапагандысцкую кампанію “Не чакай вавёрачку – тушы акурак!”, а на паліцах з алкагольнай прадукцыяй у многіх магазінах Ушаччыны з’явіліся этыкеткі з выявай вавёркі, якія нагадваюць пакупнікам аб неабходнасці своечасова тушыць акуркі.
Пра шкоду курэння супрацоўнікі МНС расказваюць і падрастаючаму пакаленню. Падчас трэцяга этапу лістападаўскай акцыі “Не прапальвай сваё жыццё!” яны правялі інтэлектуальную гульню па ўзгаданай тэме з вучнямі старэйшых класаў Глыбачанскай школы. Традыцыйна ніхто з удзельнікаў не застаўся без падарункаў і наглядна-выяўленчай прадукцыі з важнымі правіламі па бяспецы.
Факт
- З пачатку года ў вобласці адбылося больш за 250 пажараў па прычыне неасцярожнага абыходжання з агнём пры курэнні. Больш 200 чалавек у рэспубліцы сёлета загінулі з-за непатушанай цыгарэты.