Сёлета на тэрыторыі раёна рэзка павялічылася колькасць злачынстваў у сферы высокіх тэхналогій – па 2-3 за месяц.
Часцей за ўсё зламыснікі выкарыстоўваюць наступныя сцэнарыі:
1. Пасля несанкцыянаванага доступу да чужых старонак у сацыяльных сетках яны рассылаюць сябрам гэтых людзей паведамленні з просьбай аб пераводзе грошай. Падставы могуць быць розныя: “пазыч мне 20 рублёў, хутка аддам”, “пакладзі, калі ласка, 10 рублёў на тэлефон, вярну”, “можна, я перавяду табе на карту свае грошы, а то не атрымліваецца перавесці на сваю?” Далей злодзеі просяць паведаміць рэквізіты банкаўскіх карт, коды з смс-паведамленняў, а ў выніку атрымліваюць доступ да чужых грошай і здзяйсняюць крадзеж.
2. На гандлёвых пляцоўках “Куфар”, “Барахолка” і іншых знаходзяць аб’яву аб продажы маёмасці, праз розныя мэсэнжэры пішуць, што хочуць гэта набыць, і прапануюць перавесці грошы на банкаўскую карту чалавека. Калі той пагаджаецца, злодзеі высылаюць на яго адрас спасылку з фішынгавай старонкі сайта банка (яна звычайна вельмі падобная на рэальную старонку, адрозніваецца толькі сімваламі). Там, як правіла, прапануецца ўвесці логін і пароль ад інтэрнэт-банкінгу, пашпартныя даныя і іншыя звесткі. Пасля іх увядзення чалавеку паведамляецца пра памылку ці немагчымасць правядзення плацяжу. У гэты час уведзеную інфармацыю бачаць зламыснікі і ўводзяць яе на сапраўдным сайце банка.
3. На ўсё тых жа гандлёвых пляцоўках злодзеі размяшчаюць аб’явы аб продажы запатрабаванай маёмасці і выстаўляюць заніжаны кошт. У ходзе перапіскі з патэнцыяльным пакупніком яны прапануюць скарыстацца паслугамі “Дастаўка Куфар”, “Белпошта (ЕМС)”, кур’ерскіх службаў. У адрас чалавека, як і ў папярэднім выпадку, высылаецца спасылка з несапраўднай старонкі пэўнага сайта, дзе прапануецца ўвесці асабістыя даныя.
4. На мабільны тэлефон фізічнай асобы паступае званок. Як правіла, зламыснік карыстаецца сэрвісам падмены нумара і ўказвае той, што належыць якому-небудзь банку. Прадставіўшыся супрацоўнікам установы (можа назваць чалавека па імені і па бацьку, агучыць частку нумара банкаўскай карты, інфармацыю аб нядаўна праведзеных аплатах), ён паведамляе аб падазроных аперацыях па пераводзе грашовых сродкаў, раіць тэрмінова заблакіраваць карту, у сувязі з чым просіць паведаміць яе рэквізіты ці пашпартныя даныя. Пасля гэтага паведамляе, што ў адрас чалавека ён высылае смс-паведамленні з кодамі, якія яму неабходна будзе назваць пасля гукавога сігналу. У гэты час усю атрыманую інфармацыю зламыснік уводзіць на сапраўдным сайце банка.
Распаўсюджаным кіберзлачынствам з’яўляецца таксама крадзеж грошай у абанентаў сотавай сувязі. Ашуканцы просяць у грамадзян тэлефон і, робячы выгляд, што набіраюць нумар, актывуюць паслугу мабільнага банкінгу, якая дазваляе ажыццявіць плацеж і атрымаць у аператара мікразайм.
Паважаныя ўшачане! Праяўляйце павышаную пільнасць да грашовых аперацый у інтэрнэце. Памятайце, што супрацоўнікі банка ні ў якім разе не стануць вам тэлефанаваць з просьбай паведаміць інфармацыю наконт карткі ці пашпартных даных. Мяняйце пароль кожныя 2-4 тыдні, калі для ўваходу ў сістэму інтэрнэт-банкінгу карыстаецеся чужымі камп’ютарамі. Уваход у асабісты кабінет прывяжыце да МАС або IР-адраса – гэта забяспечыць максімальны ўзровень бяспекі. Не выкарыстоўвайце аўтаматычнае запамінанне пароляў у браўзеры, калі да камп’ютара маюць доступ іншыя асобы. Нікому не перадавайце мабільны тэлефон, устанавіце блакіроўку (праз пароль, сканэр адбітак пальца, фэйскантроль).
Ушацкі раённы аддзел Следчага камітэта.
