Працягваем разбірацца ў пытаннях, што хвалююць нашых чытачоў і датычацца тэмы вакцынацыі супраць COVID-19. А дапамагае нам у гэтым галоўны дзяржаўны санітарны ўрач Ушацкага раёна Павел Аляксандравіч САЎЧАНКА:
– Ці можна імунізавацца іншымі вакцынамі (маю на ўвазе планавыя, па эпідпаказаннях), калі зрабіў прышчэпку ад каранавіруса?
– Даныя па адначасовым увядзенні некалькіх прэпаратаў актыўна вывучаюцца. Пакуль жа Сусветная арганізацыя аховы здароўя рэкамендуе захоўваць мінімальны інтэрвал паміж увядзеннем вакцыны ад COVID-19 і любой іншай у 2-4 тыдні. Трэба мець на ўвазе, што лячэбна-прафілактычны курс імунізацыі супраць шаленства, экстраная прафілактыка слупняка праводзяцца па жыццёвых паказаннях, незалежна ад таго, калі была распачата (завершана) вакцынацыя супраць каранавіруса.
– Мяркую здаць донарскую кроў. Ці змагу зрабіць гэта пасля праходжання вакцынацыі?
– Так, аднак не адразу. У адпаведнасці з агульнапрынятай сусветнай практыкай, пасля імунізацыі з выкарыстаннем вакцын, што прымяняюцца ў нашай краіне, здача крыві магчыма праз 30 дзён.
– Зрабіла прышчэпку, калі яшчэ не ведала, што цяжарная. Ці можа гэта нашкодзіць будучаму малышу?
– Не трэба хвалявацца! У вакцынах, якія ў нас прымяняюцца, няма жывога рэплікуючага матэрыялу. Маецца інфармацыя аб тысячах жанчын з усяго свету, якія таксама былі прышчэплены ў перыяд цяжарнасці. Устаноўлена, што вакцынацыя не аказала негатыўнага ўплыву на плод. Многія арганізацыі аховы здароўя, у прыватнасці, цэнтр па кантролі за захворваннямі ЗША не забараняюць цяжарным імунізацыю ад каранавіруса, пакідаючы гэтае рашэнне на іх выбар.
Падрыхтавала Кацярына КАВАЛЕЎСКАЯ.
