Сельхозпредприятия Ушачского района завершают сев озимых культур

Сельское хозяйство

Восеньскія дні для аграрыяў не менш напружаныя, чым жнівеньскія.
Завяршыўшы ўборку зерневых, гаспадаркі раёна адразу пачалі закладваць аснову ўжо для будучага ўраджаю. Гэтымі днямі на Ушаччыне завяршаецца сяўба азімых.

А.Усовік.

Адны з самых вялікіх плошчаў традыцыйна ў “Ільюшынскім”, 1200 гектараў у гаспадарцы адведзена пад азімыя збожжавыя. Найбольшы акцэнт аграрыі зрабілі на пшаніцы, вылучыўшы пад яе без малага 600 гектараў, а таксама на жыта – засеяна 455 гектараў. Першая культура ў сёлетняе жніво асабліва парадавала – усе азімыя ўчасткі далі ад 30 і больш цэнтнераў з гектара.

Каб правесці сяўбу ў аптымальныя тэрміны, у сельгаспрадпрыемстве максімальна сканцэнтравалі сілы і тэхніку. Напрыклад, з цёмным пакідалі палеткі нават і ў выхадныя дні Аляксандр Селезень і Аляксандр Майсеенка, каб падрыхтаваць фронт работ на раніцу для пасяўных агрэгатаў, на якіх шчыравалі Анатоль Усовік і Анатоль Дайлідзёнак. У напружаным рэжыме разам з сейбітамі апошнія месяцы працавалі і астатнія службы, каб своечасова адрамантаваць, заправіць, знайсці запчасткі. Дарэчы, па тэмпах ільюшынцы ўдвая апярэдзілі практычна ўсе астатнія гаспадаркі. Для параўнання, у “Агра-Селішчы” і “Дземенцы” пад азімыя было запланавана па 600 гектараў. Пахваліцца падобным задзелам і тэмпам могуць толькі “Сафійскія дары”, дзе самы вялікі план у раёне – паўтары тысячы гектараў – і з ім яны ўжо практычна справіліся.

А.Селезень.

Усяго даведзены гаспадаркам план па зерневых складае гэтай восенню 5600 гектараў. Сёлета 350 гектараў адведзены пад азімы ячмень: чатыры гаспадаркі раёна ў першую чаргу засеялі вылучаныя пад яго ўчасткі. Нагадаем, што актыўна ўкараняць гэтую культуру, над вывядзеннем раянаваных сартоў якой у апошнія гады плённа працавалі беларускія селекцыянеры, параіў Прэзідэнт краіны падчас сваёй жнівеньскай паездкі па Шклоўшчыне і Аршаншчыне. Хоць азімы ячмень і патрабавальная культура, але пры правільным падборы тэхналагічнага працэсу вырошчвання можна разлічваць на высокі ўраджай. Так, на прэзідэнцкіх палях у бягучым годзе ўраджайнасць склала каля 80 ц/га.

Павялічаны сёлета на Ушаччыне плошчы азімага рапсу, вырошчваць які будуць “Ільюшынскі”, “Вялікадолецкае” і “Сафійскія дары”.

Засеяўшы палі азімымі, аграрыям яшчэ не атрымліваецца адпачыць і перавесці дух: пакуль не на ўсіх участках убрана кукуруза, трэба думаць пра ўздым зябліва, унясенне арганікі пад яравую сяўбу.

Вольга КАМАРКОВА.



Добавить комментарий

Ваш e-mail не будет опубликован. Обязательные поля помечены *