У працоўных калектывах Ушаччыны на бягучым тыдні прайшоў Адзіны дзень інфармавання. З удзельнікамі інфармацыйна-прапагандысцкіх груп, гасцямі з абласнога цэнтра абмеркавалі актуальную тэму – фарміраванне экалагічнай культуры і асабістай адказнасці грамадзян за стан навакольнага асяроддзя.
Наш уклад у экалогію
Старшыня райвыканкама Сяргей Сцяпанавіч Шамовіч абмеркаваў тэму Адзінага дня інфармавання з жыхарамі аграгарадка Глыбачка. А галоўны спікер сустрэчы – начальнік інспекцыі прыродных рэсурсаў і аховы навакольнага асяроддзя Міхаіл Аляксандравіч Шук, гаворачы пра экалагічную абстаноўку ў краіне, зразумела, прыводзіў мясцовыя прыклады.
Так, у азеляненні тэрыторый – па краіне паказчык дасягнуў жадаемага ўзроўню ў 40 працэнтаў – ёсць удзел і жыхароў сельсавета – закладзены паркі ў Глыбачцы і Павуллі. Да 2025 года доля рэк і азер, экалагічны стан якіх ацэньваецца як высокі ці блізкі да яго, павялічылася да 3/4 ад агульнага аб’ёму. Уваходзяць у гэты лік і 186 ушацкіх азёр, а на тэрыторыі раёна знаходзяцца заказнікі рэспубліканскага значэння “Крывое” і “Белае”. Выяўлена і перададзена пад ахову 36 месцаў з раслінамі і 5 з жывёламі, якія занесены ў Чырвоную Кнігу Беларусі.
Спрыяе паляпшэнню экалагічнай абстаноўкі і развіццё электратранспарту – у мінулым годзе ў карыстанні беларусаў знаходзілася 44,7 тысячы электрамабіляў. І калі раней акцэнт рабіўся на размяшчэнне станцый хуткай зарадкі ўздоўж трас, то зараз – бліжэй да месцаў пражывання. Ва Ушачах першая ўстаноўлена ля аздараўленчага комплексу і плануецца будаўніцтва другой.
Абмяркоўвалася на сходзе і тэма абароту з адходамі. М.Шук прывёў негатыўныя прыклады, калі прычэп з пластыкам і іншым бытавым смеццем выкідваецца ў кусты, а кантэйнеры запаўняюцца пустазеллем з участкаў. Старшыня райвыканкама падкрэсліў, што змянілася і схема сарціроўкі – зараз усё змесціва кантэйнераў раздзяляецца і перапрацоўваецца на Наваполацкім заводзе, і важна, каб на месцах людзі спрашчалі гэтую задачу і карысталіся скрынямі па прызначэнні.
Па тэматыцы Адзінага дня інфармавання прагучала і пытанне наконт вялікіх плошчаў зараснікаў баршчэўніку. У Глыбачанскім сельсавеце гэтая тэма актуальная, як нідзе – менавіта мясцовым саўгасам упершыню было завезена насенне гэтай кармавой культуры, распаўсюджанне якой выйшла з-пад кантролю. Зараз 30 працэнтаў плошчаў, занятых па краіне гэтай інвазіўнай раслінай, прыходзіцца менавіта на Ушацкі раён. Хімічная апрацоўка праводзіцца штогод, аднак і яна эфектыўная толькі пэўны час, а ля вадаёмаў і ў лясах яе наогул нельга прымяняць. Відавочна, што немагчыма ахапіць усе плошчы, таму вясной старшыні сельвыканкамаў вызначаюць самыя актуальныя месцы – па і ля населеных пунктаў. Праблемай застаюцца сельгасугоддзі, якія не апрацоўваюцца. “Сафійскія дары”, якім перададзены землі ля аграгарадка, не ў стане ўзараць усе ўчасткі, хоць здымалі тэхніку менавіта на кашэнне баршчэўніку.
Старшыня райвыканкама пацікавіўся таксама станам гандлёвага забеспячэння – пабываў у магазіне кааператараў, паштовым аддзяленні, амбулаторыі, школе. Адказаў на дарожныя пытанні, падкрэсліўшы, што правяраюцца не толькі аб’ёмы выканання, але і якасць работ, а літаральна ўсе звароты грамадзян трымаюцца на кантролі да іх вырашэння.
Вольга КАРАЛЕНКА.
Цаніць тое, што маем!
У рамках Адзінага дня інфармавання ў медыяцэнтры Віцебскай вобласці адбылася сустрэча першага намесніка кіраўніка Адміністрацыі Прэзідэнта Рэспублікі Беларусь Уладзіміра Пярцова з медыясупольнасцю рэгіёну.
Дадзеная тэма, як падкрэсліў Уладзімір Барысавіч, датычыцца кожнага жыхара Беларусі, і задача СМІ – развіваць экалагічную культуру, цікава і даступна даносіць да людзей разуменне каштоўнасці нашай прыроды.
– Чыстае паветра, пітная вада, прыгожыя краявіды часта ўспрымаюцца як нешта звычайнае, а тым часам для жыхароў іншых краін гэта ўжо страчаныя каштоўнасці, – адзначыў спікер.
Уладзімір Пярцоў акцэнтаваў увагу на шырокім выкарыстанні электрычнасці ў народнай гаспадарцы і жыллёвым сектары. Электрамабілі, электраацяпленне дамоў дазваляюць адысці ад паліўных рэсурсаў, шкодных выкідаў, а, значыць, палепшыць экалагічную сітуацыю. “Гэта частка канцэпцыі і стратэгіі нашай дзяржавы. На жаль, мы часам не цэнім таго, што маем. Ставімся да прыроды са спажывецкай пазіцый, не разумеючы, што гэта каштоўнасць, якую мы абавязаны захаваць для будучых пакаленняў”, – падкрэсліў першы намеснік кіраўніка Адміністрацыі Прэзідэнта.
Вольга КАМАРКОВА.
Захаваць прыроду для нашчадкаў
На сустрэчу з работнікамі Ушацкага раёна газазабеспячэння завітаў старшыня абласной арганізацыі Беларускага прафсаюза работнікаў аховы здароўя Уладзімір Плыткевіч. Ён адзначыў, што экалагічная культура – гэта не проста модны трэнд, а свядомы выбар кожнага з нас. І пачаць трэба з простых штодзённых звычак: раздзельнага збору адходаў, разумнага спажывання вады і электраэнергіі, беражлівых адносін да зялёных насаджэнняў. “Прафсаюзы заўсёды падтрымлівалі ініцыятывы, накіраваныя на экалагічную асвету, беражлівыя адносіны да рэсурсаў,” – падкрэсліў госць.
Як было адзначана ва ўсіх калектывах, у Беларусі стварэнне камфортных, экалагічна бяспечных умоў для жыцця – адзін з нацыянальных прыярытэтаў. За апошнія 10 гадоў выкіды шкодных рэчываў у паветра знізіліся больш як на трэць, у тым ліку ад аўтатранспарту – амаль напалавіну (і гэта пры тым, што аўтапарк беларусаў вырас на сотні тысяч машын). Наша краіна займае першае месца ў свеце па тэмпах зніжэння выкідаў сажы ў атмасферу, а таксама ўваходзіць у лік лідараў па скарачэнні выкідаў вуглякіслага газу. Дзякуючы рашэнням кіраўніка дзяржавы цэнтралізаванае пітное водазабеспячэнне насельніцтва ажыццяўляецца выключна з падземных крыніц, што дало магчымасць забяспечыць практычна ўсіх спажыўцоў вадой добрай якасці. Гэтаму таксама садзейнічала шырокамаштабнае будаўніцтва станцый ачысткі. Беларусь – адзін з сусветных лідараў па аднаўленні балот, а лясныя ўгоддзі пашырыліся да рэкордных маштабаў (калі разглядаць дынаміку за апошнія 100 гадоў), пакрываючы 40,5 працэнта тэрыторыі краіны.
Кацярына КАВАЛЕЎСКАЯ.
