Кожную вясну ўзрастае небяспека ўзгарання лясоў. Больш 70 працэнтаў узгаранняў паблізу лясных масіваў прыходзяцца на выпальванне сухой расліннасці. Пажаранебяспечны перыяд пачынаецца менавіта з сельскагаспадарчых палаў, якія часта пераходзяць на лес. У мінулым годзе пераважная большасць з іх адбылася па віне людзей з-за парушэнняў правіл пажарнай бяспекі. Між тым за незаконнае выпальванне сухой расліннасці, ржышча і рэшткаў саломы на палях або за непрыняцце мер па ліквідацыі палаў заканадаўствам прадугледжаны штрафы ў памеры ад 10 да 40 базавых велічынь, а за нанясенне ўрону ў асабліва буйных памерах – крымінальная адказнасць. Таму працаўнікі лясной аховы асноўную ўвагу ўдзяляюць прафілактычнай рабоце сярод насельніцтва, у зонах масавага адпачынку ствараюць спецыяльныя месцы для развядзення вогнішчаў, мінералізаваныя палосы, якія з’яўляюцца заслонай для далейшага ўзгарання. Акрамя таго ўзмоцнены кантроль за захаваннем патрабаванняў пажарнай бяспекі ў лясах. Такая работа дае вынік – у 2013 годзе ў нашым раёне не дапушчана выпадкаў узнікнення пажараў у лясах і на тарфяніках (па Віцебскай вобласці іх зарэгістравана 22 на плошчы ў 2,5 гектара).
Калі вы заўважылі ў лесе дым або агонь, пастарайцеся як мага хутчэй паведаміць аб гэтым у аддзел па надзвычайных сітуацыях і ў дзяржаўную лясную ахову – пазваніце ў лясніцтва ці лясгас (тэл.: 8-02158-2-77-30) і ўкажыце месца ўзгарання.
М.КОРШУН, інжынер па ахове лесу ДЛГУ “Ушацкі лясгас”.