Хачу расказаць аб станоўчым вырашэнні пытання, агучанага мной падчас “прамой лініі”, якую праводзіў сёлетняй вясной з чытачамі газеты дырэктар УП ЖКГ Станіслаў Браніслававіч Завадскі. Жыхарам вуліцы Усходняй і іншых прылеглых вуліц нашага аддаленага мікрараёна, каб трапіць, напрыклад, на работу ў прамкамбінат, у паліклініку ці наведаць могілкі родных, вельмі зручна ісці напрамкі па сцяжынцы ў бок вуліцы Кастрычніцкай. Вось толькі на гэтым шляху ёсць перашкода ў выглядзе ручая, зрабіць масток праз які мы і папрасілі кіраўніка камунальнага прадпрыемства. Станіслаў Браніслававіч паабяцаў вывучыць пытанне і пры магчымасці задаволіць нашу просьбу. І, як аказалася, сваё слова стрымаў: напярэдадні Дня Незалежнасці Рэспублікі Беларусь масток быў пабудаваны. Хочацца выказаць падзяку камунальнікам за тое, што дапамаглі нам эканоміць шмат часу.
Ф.ПАЦЭЙКА, г.п.Ушачы.