Слёт юных спасателей

 Злёт юных выратавальнікаў праходзіць у раёне кожны год і не з’яўляецца для дзяцей фармальным мерапрыемствам. Справа ў тым, што за часы існавання клубаў “Юных выратавальнікаў”, якія дзейнічаюць пры аварыйна-выратавальных пастах, сфарміраваліся чатыры каманды, якія рыхтуюцца, з кожным годам растуць і ў прамым сэнсе слова змагаюцца за перамогу. Вось і сёлета было так, тым больш што конкурсы вучням добра знаёмы: агітбрыгад, знатакоў, страявой падрыхтоўкі і спецыялізаваная эстафета, якую з-за дрэннага надвор’я сёлета не праводзілі. Літаральна ўсе каманды –удзельніцы не навічкі. І таму прыемна было адзначыць, як вырасла за апошні час каманда Плінскай школы. Не памылюся, калі скажу, што яны былі на галаву вышэй за астатніх, таму і атрымалі дыплом першай ступені. Другое месца заняла каманда Глыбачанскай школы, трэцяе – Вялікадолецкай і чацвёртае— Ушацкай. Усе каманды атрымалі падарункі, таксама як і пераможцы раённага конкурсу “Выратавальнікі вачыма дзяцей”, чые імёны мы называлі на старонках газеты раней. Уручала іх начальнік аддзела па справах моладзі райвыканкама Н.І.Гардзіёнак. І што яшчэ хочацца адзначыць – святочную атмасферу ўсяго мерапрыемства, якая атрымалася ў тым ліку дзякуючы канцэрту, падрыхтаванаму гурткоўцамі цэнтра пазашкольнай работы.