Напэўна ніхто не чакае прадаўжэння залатой цёплай восені так, як аграрыі. Бо калі для паляўнічых ці аматараў адпачынку на прыродзе гэта задавальненне, станоўчыя эмоцыі, то для паляводаў – неабходная ўмова для завяршэння сельскагаспадарчых работ.
У КУСГП “Арэхаўна” штодня пільна ўглядаюцца ў зводкі сіноптыкаў – нарыхтавана пакуль толькі 18,98 цэнтнера кармавых адзінак на ўмоўную галаву жывёлы. Гэта нават менш чым летась і, канечне, недастаткова, каб каровы былі сытыя зімой. Акрамя кукурузы спадзяюцца ў гаспадарцы яшчэ на другі ўкос канюшыны, але патрэбны час.
Праблема ў тым, што нават невялікія плошчы пад кукурузай убіраюцца марудна: працуюць, выбіраючы сухія ўчасткі. Больш таго, вада стаіць і на высокіх пагорках, як у Слабадзе, гэта стала і асноўнай прычынай нізкай ураджайнасці. Намнога лепей участкі ля Жывалакі, уздоўж трасы на Полацк, і асабліва ва ўрочышчы Перакавыя, што схавана за лесам насупраць Крыжоў. Папярэдне там была ўнесена арганіка, таму атрымліваюць 177 цэнтнераў зялёнай масы з гектара. Ды і пажыўная яна больш, чым з іншых палёў – пачаткі паспелі наліцца да васковай, а не малочнай спеласці.
На адвозцы было занята дзве адзінкі тэхнікі. І хоць зусім недалёка ад закладзенай ля комплексу ў Слабадзе траншэі, аднак ледзь паспявалі адвозіць сакавітую зялёнку Аляксандр Цецераў і Барыс Шалыга. За штурвалам жа кормаўборачнага комплексу “Палессе” сустрэлі незаменнага ўніверсала Аляксандра Гусёнка. Менавіта ён у гарачую пару задзейнічаны на самых адказных участках работ. І хоць у аграрыяў не бывае лёгкіх сезонаў, гэты выдаўся надзвычай капрызным ад сяўбы да ўборкі. Манеўраваў, каб не загразнуць, Аляксандр на сяўбе яравых, спатрэбіўся вопыт кіравання магутнай тэхнікай і зараз. Спыніўшыся на хвіліну на самым лепшым участку, дзе камбайн быў напалову схаваны ў кукурузе, механізатар патлумачыў адну з прычын страт ураджайнасці: “Зацішна тут, няма паблізу дарог, таму паласаваліся дзікі ад душы”.
Для “каралевы палёў” 170 цэнтнераў, канечне, не ўраджай, і ў нашых умовах яна дае ў два, а то і тры разы больш. Тым не менш, і гэта падмурак да кармавой базы. Тым больш, што сілас з кукурузы – адзін з самых любімых кармоў буронак і нават пры такой ураджайнасці менавіта ён дабавіць у зімовы рацыён каля дзвюх кармавых адзінак на ўмоўную галаву – убрана пакуль крыху больш трэцяй часткі.
А каб такія дарагія ў прамым і пераносным сэнсе кармы былі якаснымі, у “Арэхаўне” імкнуцца захоўваць тэхналогію і не распачынаюць вялікіх траншэй. Заклалі яму на 350 тон, прыступілі да другой. Акрамя таго кукуруза дазваляе менш балюча перажыць пераход на стойлавы перыяд – ёй зараз падкормліваюць статкі, якія перабраліся на зімовыя кватэры.
Вольга КАРАЛЕНКА.
