Для брендовых производителей и… домашних котов. Ушачское предприятие «Твестуба ПРО» значительно увеличило выпуск продукции

Общество

Хоць ні на адным прадпрыемстве яшчэ няма дакладных справаздач аб выніках гадавой дзейнасці, кіраўніцтва “Твестуба ПРА” ведае – у 2019-м спрацавалі лепш, чым у папярэднім, павялічыўшы выпуск прадукцыі мінімум на 40 працэнтаў.

– Звычайна перад Новым годам заказаў меней, а тут ад нашых асноўных партнёраў “Гродна Азот”, “Полацк-Шкловалакно” яны былі і напярэдадні свят, і ў наступіўшым, таму канікулы не атрымаліся, як і ўсе 3-га студзеня прыступілі да работы. Не толькі кардонныя тубы розных памераў выпускаем, але і бочачкі для ААТ “Бітарэл” ужо адгружалі, – гаворыць намеснік дырэктара па вытворчасці прад­прыемства Нэлі Канстанцінаўна Хвошч.

Яна гартае падшытыя накладныя і называе як брэндавых у краіне вытворцаў: “Віцебскія дываны”, “Магілёўшкловалакно”, “Завод Прамбурвод”, “Світанак”, так і невядомых: “Тапс”, “ЛяТрюф”, “Кравец Груп”… Агульная колькасць партнёраў “Твестубы” – больш за сотню, і далёка не заўсёды ўшачане ведаюць, для чаго рыхтуюць чарговую партыю. Галоўнае, адпавядаць заяўленым характарыстыкам, гарантаваць якасць, бо хоць тубы і кардонныя, а вагу вытрымліваюць “непапяровую”. На іх намотваюць дываны і валакно, пакуюць цяжкія помпы, бітум ці… марынаваныя агуркі. Так, новы партнёр – Кіраўскі харчовы камбінат – заказаў бочачкі, якія для ўпакоўкі прадукцыі выкарыстоўваў і наш агароднінасушыльны завод.

Геаграфія паставак вельмі шырокая. Прадукцыя “Твестубы” ёсць у кожным горадзе і пасёлку Беларусі, дзе працуе “Еўраопт” – бо менавіта для гэтага сеткавага гіганта індывідуальны прадпрымальнік пастаўляе стрэйчплёнку, якая намотваецца на ўшацкія кардонныя гільзы невялікіх памераў.

Не менш шырокае і прызначэнне прадукцыі “Твестубы ПРА”. У асноўным яна ідзе для замацавання і транспарціроўкі тавару. Аднак служыць і асновай для самастойных новых вырабаў. Напрыклад, “Каньён-Заа”, “Кот і пёс” з бочачак робяць домікі, канапы для хатніх гадаванцаў. З гэтай фірмай у супрацоўнікаў нашай кампаніі завязаліся сумесныя стасункі – многія яе работнікі набылі сабе прыгожыя прылады, якія вельмі даспадобы катам. А вось падарунак РУП “Белкартаграфія” – стрэйчкарту свету – пакуль не павесілі. Гэта модны зараз падарунак, на якім трэба сціраць ахоўны слой на выяве той краіны, дзе пабываў. Наогул дзякуючы сваёй здавалася б не надта цікавай вытворчасці супрацоўнікі “Твестубы” ў курсе асноўных накірункаў развіцця айчыннай прамысловасці, а таксама сувенірнай прадукцыі. Менавіта перад Новым годам яны займаюцца пашыраным выпускам прыгожых скрыначак, у якія Брэсцкі панчошны камбінат не першы год пакуе шкарпэткі, лікёра-гарэлачныя заводы – падарункавыя экзэмпляры, харчовыя камбінаты – пячэнне ці цукеркі.

І штогод “Твестуба ПРА” прырастае новымі партнёрамі. Так, з лета супрацоўнічаюць з “Бумексам”, што выпускае папяровую прадукцыю, Малінаўшчызненскім спіртзаводам , “Мегатопам” – хаця нават не ведаюць, што іменна кампанія па продажы абутку пакуе ў даўгія тубусы. З’явіліся да Новага года і такія заказчыкі, як рэлігійная абшчына рымска-каталіцкай царквы з-пад Мінска.

Прычым, рэкламу ўшацкая фірма не дае ні ў якія сродкі масавай інфармацыі. Яна ў ёй не мае патрэбы: іх знаходзяць праз сайт, з дапамогай “сарафаннага радыё” і, канечне, дзякуючы рабоце намесніка генеральнага дырэктара, які і займаецца вывучэннем рынкаў збыту і маркетынгам. Больш таго, могуць сабе дазволіць і адмаўляць, выбіраючы больш выгадныя заказы – напрыклад, прыгожую падарункавую ўпакоўку, у якую некаторыя кампаніі проста фасавалі цукеркі, выпускалі мінімум па 500 адзінак.

Практычна ўся прадукцыя “Твестубы ПРА” – імпартазамяшчальная – раней яе завозілі выключна з-за мяжы. Зараз яны закрываюць айчынны рынак і нават пастаўляюць у іншыя краіны: летась – у Расію, дзе, дарэчы, ёсць вытворцы падобнага тавару. І пастаянна развіваюцца – у 2019-м годзе зманціравана абсталяванне і абкатаны выпуск вугалкоў – абсалютна новага віду прадукцыі з кардону, які таксама не выпускаецца ў Беларусі. Зараз удзельнічаюць у некалькіх тэндарах, якія і павінны назваць новых заказчыкаў. Чарговых, якія становяцца пастаяннымі.

Вольга КАРАЛЕНКА.



Добавить комментарий

Ваш адрес email не будет опубликован. Обязательные поля помечены *