Ушачский филиал облпотребобщества составил конкуренцию «Е-доставке» и теперь привозит товары на дом

Ушацкі філіял аблспажыўтаварыства свое­часова зарыентаваўся і прапанаваў ушачанам вельмі карысную паслугу: дастаўку тавараў на дом. Прычым, калі сацыяльныя работнікі і валанцёры мінімізуюць выхад у мнагалюдныя месцы пажылых людзей ці інвалідаў, то работнікі гандлю – абсалютна ўсіх. Не важна, ты маладая матуля ці пенсіянер, жывеш ва Ушачах ці ў аддаленай вёсцы. Прадукты харчавання прывязуць на дом, адзіная ўмова – сума заказу павінна быць не меней чым 30 рублёў.

Калі ўлічыць, што ў асартыменце тавараў практычна ўсё – ад круп, цукру, алею да сокаў і ахалоджанага фаршу, то няма праблем купіць нават не пра запас, а на пару дзён. Усё, што патрабуецца ад вас – быць дома, каб прыняць заказ. Фарміруюць яго работнікі “Кулінарыі”, а дастаўляецца любой машынай філіяла, якая ідзе ў спадарожным напрамку ці накіроўваецца спецыяльна.

На сённяшні дзень паслугай скарысталася 16 чалавек. Цікава, што пераважная большасць з іх – жыхары гарпасёлка і навакольных вёсак – Двор Пліна, Градзянец. З аддаленых толькі Глыбачка і Касары. Дарэчы, з часу падачы аб’яў адбыліся змены: акрамя пералічаных там бакалеі, напіткаў, мяса курыцы, можна заказваць і сметанковае масла, іншыя малочныя прадукты. А таксама ўласныя вырабы кандытарскага і кулінарнага цэхаў – кулічы, тарты, галубцы, пельмені і многае іншае. Асартымент і кошт тавараў пастаянна мяняюцца, таму лепш удакладняйце іх непасрэдна падчас падачы заяўкі.

Такім чынам нашы гандлёвыя работнікі склалі канкурэнцыю “Е-дастаўцы”. Гэтая паслуга “Еўраопта” зараз перагружана, і філіял прыйшоў на дапамогу людзям, якія не хочуць лішні раз выходзіць з дому. Так што калі вы не жадаеце падвяргаць сябе рызыцы, заказвайце прадукты харчавання па тэлефонах 358-42-06, 510-07-02, 291-92-45 (МТС). І хоць у сваіх рэкламных лістах філіял агаворваў, што тэрмін дастаўкі – два дні, нават у аддаленыя вёскі яна ажыццяўлялася ў той жа, ну а па Ушачах, як правіла, на працягу гадзіны.

Вольга Караленка.