Сапраўдны спартыўны талент падобны залатым крупінкам у тонах горнай пароды. Адшукаць яго няпроста – асабліва не маючы эфектыўнай і навукова абгрунтаванай сістэмы. Прэзідэнцкі спартыўны клуб сумесна з Міністэрствам адукацыі і Міністэрствам спорту і турызму, аб’яднаўшы намаганні, стварылі эксперыментальны праект па адборы адораных дзяцей “Алімпійскі талент”.
Для яго старту былі абраны тры раёны Віцебскай вобласці – Глыбоцкі, Докшыцкі і Ушацкі. На першым этапе па тэстах, прадугледжаных праграмай дысцыпліны “Фізічная культура і здароўе”, настаўнікі фізкультуры пратэсціравалі каля паўтысячы 9-10-гадовых школьнікаў – адпаведна даследаванням, менавіта гэты ўзрост перад пачаткам палавога выспявання найбольш аптымальны для ацэнкі патэнцыялу дзяцей.
Для другога этапу тэсціравання, які праходзіў на мінулым тыдні ў форме міжраённых спаборніцтваў на базе спарткомплексу “Юнацтва-Ушачы”, былі адабраны 60 школьнікаў з прыгаданых раёнаў – па 10 хлопчыкаў і дзяўчынак з кожнага.
“На гэтым этапе патэнцыял дзіцяці мы выяўляем з дапамогай 6 тэстаў, галоўны крытэрый якіх – здольнасць дакладна кіраваць сваімі рухамі”, – тлумачыць навуковы кіраўнік галіновай лабараторыі спартыўнай біямеханікі Навукова-тэхналагічнага парку БНТУ “Палітэхнік” Валерый Еўстаф’евіч Васюк.
Пра тое, якія практыкаванні давядзецца выконваць, дзеці не ведаюць – а таму павінны хутка зарыентавацца. Так, з заданнем некалькімі скачкамі пераадолець пэўную дыстанцыю і прызямліцца як мага бліжэй да нанесенай на падлогу лініі амаль усе хлопчыкі і дзяўчынкі спраўляюцца няблага. Але задача ўскладняецца: у другі раз зрабіць гэта трэба з заплюшчанымі вачыма, а пасля кожнага скачка павярнуцца на 360 градусаў. Тут поспех чакае ўжо толькі тых, хто добра каардынаваны, здольны запомніць і дакладна ўзнавіць рухі.
◆ «Лічу гэты праект слушным і цікавым, асабліва ў тым плане, што пад яго ўвагу трапяць вясковыя дзеці, якім звычайна не так проста пра сябе заявіць, – адзначае настаўнік фізкультуры Ільюшынскай СШ В.І.Акулёнак. – А сярод сельскіх школьнікаў шмат здольных: мяркуйце самі – у першым этапе адбору ўдзельнічалі 10 маіх вучняў, 5 з іх прайшлі ў другі, мяркую, што хтосьці апынецца і ў трэцім”.
Па выніках спаборніцтваў спецыялісты лабараторыі спартыўнай біямеханікі адабралі 18 школьнікаў для трэцяга этапу праекта: хлопчыкі і дзяўчынкі з самым высокім патэнцыялам накіруюцца ў Мінск на двухдзённы збор, дзе іх чакае паглыбленае тэсціраванне з серыі заданняў, звязаных з комплексным праяўленнем рухальных, кагнітыўна-каардынацыйных і псіхаматорных здольнасцяў у штучна змяняемых умовах знешняга асяроддзя.
◆ У складзе брыгады спецыялістаў, якая абслугоўвала спаборніцтвы другога этапу, прыемна было ўбачыць выпускніка Ушацкай школы Мікіту Галая. Наш зямляк скончыў спартыўна-тэхнічны факультэт БНТУ, магістратуру, а зараз прымае ўдзел у ажыццяўленні праекта “Алімпійскі талент”.
Ну а ўшацкі спартыўны комплекс у бліжэйшым будучым можа стаць галоўнай пляцоўкай для далейшай рэалізацыі эксперыментальнага праекта “Алімпійскі талент”. Свой выбар арганізатары тлумачаць тым, што гэта адна з лепшых спартыўных баз рэгіёну, дзе створаны ўсе ўмовы для плённага вучэбна-трэніровачнага працэсу. Разглядаецца ідэя сабраць ва Ушачах таленавітых дзяцей прыкладна з дзевяці бліжэйшых раёнаў, якія будуць атрымліваць адукацыю, трэніравацца па спецыяльнай праграме, мэтанакіравана і гарманічна развівацца, пасля чаго зробяць выбар на карысць пэўнага віду спорту і працягнуць навучанне ва ўчылішчах алімпійскага рэзерву. Калі эксперымент будзе прызнаны паспяховым, гэты вопыт распаўсюдзяць на іншыя рэгіёны краіны.
Наталля БАГДАНОВІЧ.
